Pinaigting ng Philippine Coast Guard (PCG) Romblon ang pagsusuri sa mga kagamitang panlaban sa sunog at kahandaan sa emergency ng mga pampasaherong barko sa lalawigan kasunod ng mga naitalang aksidente sa karagatan noong nakaraang mga buwan.
Bilang bahagi ng hakbang, nagsagawa ang Coast Guard Station (CGS) Romblon sa pamamagitan ng Coast Guard Sub-Station (CGSS) Romblon ng inspeksyon sa Port of Romblon noong Nobyembre 4 at 5.
Kabilang sa mga sinuri ang M/V Maria Xenia at M/V Reina Timotea upang matiyak ang pagsunod ng mga ito sa mga pamantayan sa kaligtasan laban sa sunog.
Sinuri ng mga tauhan ng Coast Guard ang fire detection at extinguishing systems, emergency exits at exit signs, firefighting equipment, protective gear, kaligtasan sa machinery space, at kaalaman ng mga tripulante sa mga pamamaraang dapat sundin kapag may emergency.
Batay sa resulta ng inspeksiyon, kapwa sumusunod ang dalawang barko sa mga naaangkop na fire safety requirements na saklaw ng kampanya. Nauna na rin silang sumailalim sa Vessel Safety Enforcement Inspection (VSEI) at Emergency Readiness Evaluation (ERE) sa unang bahagi ng taon.
Muling hinimok ng PCG ang mga operator ng barko at tripulante na tiyaking nasa maayos na kondisyon ang lahat ng kagamitang pangkaligtasan at alam ng mga tauhan ang wastong pagtugon sa oras ng sunog at iba pang emergency.
