Tinatayang 1,000 scholarship slots para sa rehiyon ng MIMAROPA ang sumailalim na sa validation at evaluation sa ilalim ng Bagong Pilipinas Merit Scholarship Program (BPMSP) para sa School Year 2026–2027.
Sa ilalim ng programa, makatatanggap ng ₱45,000 na tulong-pinansyal ang bawat kwalipikadong estudyante sa kolehiyo na papasok sa mga prayoridad na degree program sa mga kwalipikadong higher education institution (HEI).
Ayon kay Commission on Higher Education (CHED) MIMAROPA Regional Director Edna Imelda F. Legazpi, hindi pa pinal ang kabuuang bilang ng scholarship slots na ilalaan para sa rehiyon.
Tinalakay ni Legazpi ang programa sa Nobyembre 4 na episode ng Arangkada MIMAROPA, isang programan ng Philippine Information Agency (PIA) MIMAROPA at Radyo Pilipinas Palawan.
Inilunsad noong 2025, naglaan ang BPMSP ng kabuuang 20,000 scholarship slots sa buong bansa para sa mga kwalipikadong mag-aaral na kukuha ng higher education at technical-vocational education sa magkahiwalay na programa.
Para sa higher education track na pinangangasiwaan ng CHED, kailangang incoming first-year college student ang aplikante at makapasa sa mga itinakdang pamantayang pang-akademiko.
Kabilang sa mga kwalipikado ang mga nagtapos ng Grade 12 na kabilang sa top five ng kanilang graduating class o may general weighted average na hindi bababa sa 95 porsiyento.
Kailangan ding mag-enroll ang mga aplikante sa mga prayoridad na degree program na kinilala ng CHED at iniaalok ng mga kwalipikadong higher education institution.
Ayon kay Legazpi, nakapagtukoy na ang CHED ng mga state universities and colleges na magiging katuwang sa pagpapatupad ng programa habang tinatapos ang pagtukoy sa kabuuang alokasyon para sa MIMAROPA.
Pinayuhan ang mga interesadong estudyante na tiyaking kabilang sa opisyal na listahan ng mga kwalipikadong paaralan at kurso ang kanilang napiling institusyon at degree program.
