Aabot sa labin-limang katao kabilang ang ilang Persons with disabilities (PWDs) ang nagsanay kamakailan sa paggawa ng Bamboo at Nito handicraft sa Barangay Panique, bayan ng Odiongan, Romblon.
Ang nasabing pagsasanay ay handog ng lokal na pamahalaan ng Odiongan lalo na ang Municipal Tourism Office, Person with Disability Affairs Office at ng Community Organizers sa mga PWDs na naghahanap ng dagdag na pagkakakitaan ngayong panahon ng pandemya.
Ilan sa mga nagawang produkto ng mga nagsanay ay market basket, plant basket, nigo, tray, house décor at iba pa.
Dumalo sa pagtatapos ng training si Mayor Trina Firmalo-Fabic kasama ang ilang opisyal ng bayan ng Odiongan.
Sa kanyang mensahe sa kanyang facebook post, nangako ang alkalde na ipagpapatuloy ng munisipyo ang pagtulong sa mga PWD at sa pag-develop at pag-market ng kanilang nagawang mga produkto mula sa kawayan at nito.
“Ang ganda ng mga nagawang produkto mula sa kawayan at nito ng mga nagsipagtapos kanina sa training na sponsored ng Municipal Tourism Office at Persons with Disability Affairs Office para sa mga PWDs at mga magulang ng mga PWDs sa Brgy Panique,” proud na ibinahagi ng alkalde.
“Asahan niyong tutulungan pa ng munisipyo sila sa pag develop at pag market ng kanilang mga produkto para sa dagdag kita nila. Nag turnover din ng mga kagamitan sa kanila,” dagdag pa nito.
