Upang mas mahikayat ang mga kabataan na manatili sa kanilang mga bahay, inilunsad ng Sangguniang Kabataan ng Odiongan ang programang ‘Libro-on-the-Go', kung saan binibigyan nila ang mga kabataan na humiram ng mga libro na maari nilang basahin habang nagpapatupad ng community quarantine dahil parin sa coronavirus disease 2019 o Covid-19.
Sa panayam ni Secretary Martin Andanar ng Presidential Communications Operations Office (PCOO) kanina sa #LagingHanda Network Briefing, sinabi ni Kaila Yap, Sangguniang Kabataan President ng Odiongan, Romblon, na mas mahasa pa ang mga kakayahang intelektwal ng mga kabataan sa pamamagitan ng pagbabasa ng libro.
“Siyempre po, through the initiative of our honorable Mayor Trina, the program aims to encourage the youth to take this crisis as an opportunity to be intellectually productive by reading books. Kasi po sa simpleng pagbabasa ng libro, they can go to other places while staying at home. Yung imagination nila ay nagwo-work and yung intellectual being and mental nagwo-work kahit na nasa bahay lang po sila kahit walang school. They will also keep them safe while they are on community quarantine,” ayon kay Yap.
Aniya, ang konsepto ng Libro-on-the-Go ay nagmula sa programang Mercado-on-the-go ng lokal na pamahalaan ng Odiongan kung saan ang palengke at mga paninda ang inilalapit ng munisipyo sa mga barangay para hindi na kailangang lumabas ng barangay ang publiko.
Nagsimula aniya sila sa kakaunting bilang ng mga libro hanggang sa dumami na ang nagdo-donate para ipahiram sa mga kabataan.
“Ang mga libro na iyon ay dalawang araw lang po (nakalap). Kasi nag-start kami ng preparation noong April 17, then after that, nag-post na kami sa Facebook, nag-meeting lahat ng SK officials and volunteers about the project. Nag-post po kami at nakahanap kami ng potential donors ng libro at sa dalawang araw na yun, nakakolekta kami ng mahigit 300 na libro at hanggang ngayon, mayroon pa rin pong nagdo-donate sa amin ng libro kaya po nakakatuwa,” ayon pa kay Yap.
“Lahat po ng libro ay donated lang po sa amin ng mga tao. Nakakatuwa po, kahit yung mga tao sa komunidad, nakakahanap sila ng paraan para maibigay sa amin ang mga libro. Magcha-chat sila o magpapahatid ng mga libro para mapakinabangan ng mga kabataan,” dagdag pa nito.
Maliban sa Libro-on-the-Go, nagkaroon rin ang Sangguniang Kabataan ng Odiongan ng mga paligsahan sa pamamagitan ng kanilang Facebook page katualad ng pagsusulat ng mga tula, pagalingan mag Tik-tok, at mag-vlog sa loob ng bahay.
Sa nasabing paligsahan umabot ng mahigit 100 ang sumali sa pagsusulat ng tula sa Tagalog, English, at ASI, lenggwahe sa Odiongan; umabot naman sa 56 ang nagpadala ng kanilang mga Tiktok videos; at umabot ng 47 ang nagpadala ng kanilang ‘quarantine-inspired hugot lines'.
Sa nasabing panayam, pinasalamatan rin ni SK Kaila Yap ang mga kabataan sa Odiongan at Romblon na patuloy na kumikilos para sa ikauunlad ng bayan at ng probinsya.
“Kapag maunlad ang ating sarili, maunlad ang ating community, uunlad din po tayo as a whole kaya ‘take God always with you' (laging panatilihin ang Panginoon sa inyo). Lagi lang po sa Diyos ang mga kabataan. Lahat ng ginagawa natin ay may kapakinabangan, may rason, kaya po alamin natin yun and ituon natin ang focus sa ating goal,” mensahe nito.
