Natanggap na ng Romblon Provincial Hospital (RPH) ang tsekeng nagkakahalaga ng P1,000,000 mula sa Philippine Charity Sweepstakes Office (PCSO), alinsunod sa napapaloob sa Republic Act 11469 o ang Bayanihan to Heal as One Act.
Ayon kay Kristy Fetalver ng PCSO-Romblon Branch, ang tseke na natanggap ng RPH ay ayuda ng PCSO sa ospital sa paglaban nito sa coronavirus disease 2019 o Covid-19.
Ang tseka ay bahagi ng P447-million na ayuda ng PCSO sa 81 public hospitals sa buong bansa mula sa PCSO Charity Fund sa ilalim ng Calamity Assistance Program (CAP).
Tinanggap ito nina Dr. Benedict Anatalio, Chief of Hospital ng RPH kasama ang kanilang Administrative Officer na si Lanie Maranio.
Aniya ang nasabing pera ay magagamit ng ospital pambili ng mga testing kits, Personal Protective Equipment (PPEs), gamot, at mga gamit sa ospital.
Matatandaang napapaloob sa Bayanihan to Heal as One Act na kinakailangang magtulungan ng lahat ng ahensya ng gobyerno para sa suportahan ang mga frontline health workers na lumalaban sa krises na ito.
