Natapos na nitong Biyernes ang sampung (10) araw na pansamantalang pagtatrabaho sa gobyerno ng 625 drayber ng tricycle, manininda, katulong at iba pang manggagawa ng informal sector na nawalan ng pagkakakitaan dahil sa ipinatutupad na enhanced community quarantine (ECQ).
Ang mga ito ay nagtrabaho sa gobyerno bilang bahagi ng Tulong Panghanapbuhay sa Ating Displaced/Disadvantaged Workers Program #Barangay Ko, Bahay Ko Disinfecting/Sanitation Project (TUPAD #BKBK) na bahagi ng social amelioration program ng Department of Labor and Employment (DOLE).
Ayon kay Roderick Tamacay, provincial director ng DOLE-Romblon, nang ito ay maging panauhin sa Online Kapihan sa PIA-Romblon, sa darating na April 6 ay makakatanggap na ng sahod na nagkakahalaga ng P320 kada araw ang mga benepisyaryo o may kabuoang P3,200 para sa kanilang sampung (10) araw na trabaho.
Ang mga nabanggit na benepisyaryo ay pinaglinis at pinag-disinfect lamang sa kanilang bahay at bakuran sa loob ng mga nabanggit na araw.
Bagama't limitado lang ang nakapasok sa TUPAD #BKBK ng DOLE, gumagawa na umano sila ng paraan para madagdagan ito.
“Doon sa TUPAD po, meron po tayong fixed budget jan na aabot sa P2,000,000 bagaman may mga nakabinbin tayong hiling sa regional office [para dagdaga] pero ‘yun po ay subject pa rin sa aprubal ng regional office. Noong nalaman natin na P2,000,000 lang ‘yung pondo natin sa Romblon ay nag-request agad tayo at nakiusap sa mga local government units sa pamamagitan ng kanilang mga Public Employment Service Office (PESO) na magpasa ng dagdag na #BKBK proposal nang sa ganun ay mapalawak natin ‘yung coverage ng TUPAD ,” ayon kay Tamacay.
Dagdag pa ni Tamacay, layunin rin ng DOLE na tulungan umano lahat pero kung hindi umano makapasok sa kanilang programa ang isang nagtatrabaho sa informal sector ay maaari silang mag-aplay sa social amelioration program naman ng Department of Social Welfare and Development (DSWD).
Base sa pinakahuling taya ng ahensya, may tinatayang 26,902 na manggagawa ng informal sector ang posibleng pansamantalang nawalan ng pagkakakitaan sa lalawigan dahil sa ECQ.
Inihayag rin ni Tamacay na may mga nakahanda na silang plano para naman sa mga tuluyan ng nawalan ng trabaho dahil sa ipinatutupad ng ECQ sa lalawigan.
“May mga regular programs po kami pagdating sa mga ganyan [na nawalan talaga ng trabaho]. Meron po tayong mga job fairs kung saan iniimbeta natin lahat ng company doon na kumbaga magsagawa ng job fair sa isang lugar. Meron rin tayong tinatawag na employment facilitation program kung saan ‘yung ating mga displaced workers ay pwede lumapit sa DOLE o sa PESO managers, then ilalapit naman sila sa pwede nilang pasukang kompanya,” pahayag ni Tamacay.
