Inilahad ng pamunuan ng Department of Social Welfare and Development – Mimaropa (DSWD-Mimaropa) na aabot na sa 94,760 na senior citizen sa buong rehiyon ang nabigyan na nila ng social pension na umabot sa kabuoang P540,495,000 para sa taong 2019.
Ang nasabing 94,760 na senior citizen ay 59.67% ng kabuoang bilang na kwalipikadong benepisyaryo sa mga probinsya ng Oriental at Occidental Mindoro, Marinduque, Romblon, at Palawan.
Ayon sa datus ng DSWD-Mimaropa na inilabas kamakailan, aabot na sa 25,773 senior citizens sa Oriental Mindoro ang nabayaran, habang 17,049 naman sa Occidental Mindoro. 7,183 naman sa Marinduqe ang nabigyan na ng social pension, 16,383 naman sa Romblon, at 28,372 sa Palawan.
Sa panayam naman ng Philippine Information Agency – Mimaropa kay Chatty Decena, information officer ng kagawaran sa rehiyon, sinabi nito na ang listahan ng mga senior citizens na nabigyan ng social pension mula June 2019 hanggang January 2020 ay nagmula pa sa Central Office, at inaasahang madagdagan pa sa mga susunod na mga linggo.
Aniya, ang mga pangalang maibaba bago matapos ang kasalukuyang buwan ay makakatanggap pa ng 2019 social pensions habang ang mga pangalang mailalabas paglagpas ng Pebrero ay tanging ang 2020 pensions na lamang ang matatanggap.
Para sa katangungan, maari umanong makipag-ugnayan ang publiko sa pinakamalapit na opisina ng Department of Social Welfare and Development sa inyong probinsya.
