Odiongan, Romblon (PIA) — May aabot sa 17 empleyado ang kinailangang kunin ng Kagawaran ng Paggawa at Empleyo sa Romblon upang ilagay sa iba’t ibang munisipyo ng lalawigan para magsagawa ng profiling sa mahigit 700 child laborers sa probinsya ngayong taon.
Sa panayam ng PIA-Romblon kay DOLE-Romblon provincial director Roderick Tamacay nitong Biyernes, August 16, sinabi niya na nagsimula na ang kanilang survey noong nakaraang buwan sa mga isla ng Sibuyan, Romblon, Carabao at Tablas.
“Ang purpose niyan ay magkaroon ng database ang ahensya kaugnay sa datus ng Child Laborers sa bansa at kung paano sila mabibigyan ng tulong ng gobyerno para malayo sa maagang pagtatrabaho,” ayon kay Tamacay.
Base sa binigay sa kanilang datus ng Bureau of Workers with Special Concerns, may aabot sa 180 na child laborers ang kailangan nilang puntahan sa Sibuyan Island, 120 child laborers naman sa bayan ng Romblon, 60 sa Carabao Island, at 361 naman sa buong Tablas Island.
Ayon kay Tamacay, ang pag-profile sa mga child laborers sa probinsya ay bahagi ng commitment ng ahensya para mabigyan ng tulong at mailihis ang landas ng mga bata sa maagang pagtatrabaho.
“Sinusuri namin ‘yung needs nila, at base doon, pwede natin sila isangguni sa mga concerned agencies para mabigyan ng tulong kagaya ng pagbibigay ng livelihod sa kanilang mga magulang nang sa ganun ay hindi na nila kailangang magtrabaho ng maaga dahil may napagkukunan na ng pera,” dagdag ni Tamacay.
Inaasahan ng Department of Labor and Employment – Field Office Romblon na matatapos ang profiling sa mga child laborers bago matapos ang taon 2019 para maagang mabigyan ng tulong ang mga bata.
