Ang Rural Health Unit (RHU)-Romblon ay nagkasa ng libreng Operation Tuli at Dental Services para sa mga kabataan ng Bgy. Sawang, Romblon kamakailan.
Dalawampu’t limang kabataang lalaki ang sumalang sa libreng pagpapatuli na pawang nasa edad 9-12 taong gulang at 20 naman ang nagpabunot ng ngipin.
Ayon kay Dr. Merly Valen H. Mallorca, Municipal Health Officer, ang barangay outreach program ay taunang ginagawa ng RHU tuwing bakasyon para sa mga kabataang lalaki.
Malaking tulong aniya ito sa mga kabataang naninirahan sa malalayong barangay lalo na sa mga mahihirap na pamilya na nais magpatuli nang ligtas at maayos.
Nagtutungo aniya ang mga RHU personnel at staff sa mga barangay health station upang magsagawa ng ganitong uri ng serbisyo sa mga kabataan. Nais din nilang maiwaksi na ng mga Romblomanon ang kinagisnang uri na pagtutuli na nagiging dahilan ng impeksiyon.
“Ang pagtutuli ay pinahahalagahan aniya ng mga magulang ang para sa kalusugan ng batang lalaki pero minsan ay ipinagpapaliban ito ng ilan dahil sa kakulangan ng perang ibabayad sa pribadong doktor,” pahayag ni Mallorca.
Kapag panahon ng bakasyon aniya ang pinipili nilang magsagawa ng ganitong outreach program sa mga barangay sapagkat mahaba ang panahon na makakapagpagaling ang mga batang nagpatuli.
Nagpasalamat naman ang mga opisyal ng barangay sa pangunguna ni Kapitan Gil Maaba at barangay health workers sa RHU-Romblon dahil maraming bata ang nabigyan nila ng maayos na serbisyo.
Nagsagawa na rin sila ng kahalintulad na aktibidad sa ilang barangay na isinabay nila sa Brigada Eskwela ngayong taon. (DMM/PIA-MIMAROPA/Romblon)
