Marami na ang nag-aabang at kating-kati nang mapanood ang “Avengers: Endgame” dahil gusto nilang malaman kung papaano babagsak ang kalabang si Thanos. Pero sa tunay na buhay para sa Pinoy, malamang na marami rin ang gustong malaman kung ano ang endgame sa ginagawang pang-aagaw ng China sa mga teritoryo ng Pilipinas sa West Philippine Sea.
Nitong nakaraang mga araw, nagpupuyos na naman ang loob ng ating kurimaw na mahilig sa tikoy nang mapanood ang balitang ginagahasa pa rin ng mga Tsinong mangingisda ang yamang-dagat sa Scarborough Shoal, tulad nang pagkuha ng mga taklobo. Napakaraming barko o bangkang pangisda ng mga Tsino ang nangga-gang rape sa dating pangisdaan na iyon ng mga kababayan natin.
Bagaman nakakapunta pa rin naman doon ang mga mangingisdang Pinoy, binabakuran naman daw ng mga sasakyang pandagat ng China at mga mangingisdang Tsino ang partikular na lugar kung saan may nahuhuling magagandang uri ng isda. At dahil nakabaon sa ilalim ng dagat o nakakabit sa mga bato ang mga malalaking taklobo, binubungkal daw ng mga Tsino ang ilalim ng dagat kaya nabubulabog ang mga yamang-dagat na nandoon.
Hindi lang iyon, kapansin-pansin din na maraming bahura o corals na ang nawasak o patay na. Kaya naman nangangamba ang mga mangingisdang Pinoy na baka wala nang pakinabangan sa lugar na iyon ang susunod na henerasyon ng mga mangingisda. Pero ang mas tamong tanong siguro, abutan pa kaya ng susunod na henerasyon na tubig o bahagi pa ng dagat ang Scarborough o maging isang artificial island na rin?
Naglalaro kasi sa maruming isip ng isa pa nating kurimaw na baka sinasadyang wasakin na ng mga Tsino ang ilalim ng dagat at pinapakinabangan na lang ang mga taklobo, bilang paghahanda ng China sa paglalagay doon ng mga buhangin. Aba’y hindi malayong mangyari iyon kung pagbabatayan natin ang mga nasira nang bahura. Kung patay na ang mga corals, magmimistulang bato na rin ang mga iyon na dagdag pampatibay siguro sa gagawing isla ng China. Anong malay natin?
Pero sa kabila ng galit ng maraming Pinoy, mukhang hindi naman nababahala si Foreign Affairs Sec. Teddy Boy Locsin, na ang tanging plano ay singilin lang daw ang China sa ginagawang paghahakot ng taklobo. Wala yata sa bokabularyo niya ang pangambang inaagaw na nang tuluyan ng China ang naturang lugar, at inaagaw ng mga Tsino ang kabuhayan ng mga kababayan natin. Kaya huwag na tayong magtaka na isang araw ay makita na lang natin sa satellite picture na may isla na doon.
But wait there’s more, sabi ni Locsin, mga “militia” o sibilyang armado, o mga poacher o iligal na mangingisda ang sakay ng mga bangkang nakunan din ng larawan na malapit sa mga teritoryong sakop ng Pilipinas. Gayunman, hindi malinaw sa Tweet ng kalihim kung saan ang partikular na lugar ang tinutukoy niyang namataan ang mga Chinese militia o poachers.
Pero batay sa mga naunang ulat, bukod sa Scarborough, may nakita ring mga bangka ng mga Tsino sa Pagasa Island, at pati na sa Kota at Panata Islands. Kung totoo ang sinasabi ni Locsin na militia o poachers ang mga sakay ng mga bangka at walang pahintulot ng China ang paglalayag na iyon, aba’y hindi ba dapat kumilos na ang Pilipinas para itaboy o palubugin ang mga mokong na iyon? Gaya ng ginagawa ng ibang bansa na pinapasabog at ikinukulong ang mga Chinese na iligal na nangingisda sa kanilang teritoryo.
At kung mga militia at poacher din ang mga nasa Scarborough, aba’y parang mahirap yatang paniwalaan na hindi iyon alam ng China. Bakit ka ninyo? Dahil noon pa mang 2012 ay nakahuli na ang mga awtoridad natin ng mga barko nila na may laman na sangkatutak na taklobo. Katunayan, ang pagkakahuling iyon ng Pilipinas ang isa sa mga naging dahilan ng mas matinding girian ng Pilipinas at China.
Maliban sa pagpuna na paglabag sa sobereniya ng bansa ang paglalayag ng mga barko at bangkang pangisda kuno ng mga Tsino sa mga teritoryo ng Pilipinas, wala pa rin talagang mahilab-hilab na pahayag ang pamahalaan at si Locsin tungkol sa mga bagong nangyayari sa WPS.
Kung pagbabatayan ang survey ng Social Weather Station na mas nakararami (49 percent) ang mga Pinoy na umaayon sa isinampang kaso sa International Criminal Court nina dating DFA Sec. Albert Del Rosario at dating Ombudsman Conchita Carpio-Morales laban sa China kaugnay ng Scarborough, aba’y baka mas dumami pa ito ngayon.
Hindi rin kataka-taka kung maapektuhan nito ang resulta ng gaganaping halalan sa Mayo. Abangan natin
Tandaan: Ang tao’y nilalang na politiko at madalas ang politiko’y nanlilinlang ng tao!
(Twitter: follow@dspyrey)
