Nasa pangangalaga na ngayon ng Bahay Kalinga ang Romblomanong OFW na si Marissa Galisanao na iniwan sa isang ospital sa Riyadh, Saudi Arabia matapos umanong magkasakit.
Ayon sa nag-upload ng kanyang litratong nag-viral sa social media na si Venx Bascon, kinuha na ng Bahay Kalinga si Galisanao mula sa Police Station kung saan siya pansamantalang dinala matapos na makalabas mula sa ospital.
Mahigit isang taon na umano si Galisanao na nagtatrabaho sa kanyang amo sa Saudi ngunit pinapulis umano siya nang magdesisyong aalis na dahil sa sakit niyang ulcer.
Ayon sa video ni Bascon kung saan nagsasalita si Galisinao, hindi niya umano kilala ang nag-iwan sa kanya sa ospital noong panahong natagpuan siya ng mga kababayan niyang Pilipino.
Patuloy na nakikipag-ugnayan ang Romblon News Network sa agency ni Galisanao na RAL Career Link Inc. kaugnay sa planong pagpapauwi sakanya dito sa Pilipinas.
