Hinihimok ng tanggapan ng Romblon Electric Cooperative (ROMELCO) Inc. ang mga senior citizen na member / consumer para sa pagre-renew ng kanilang senior citizen discount upang patuloy na makatanggap ng diskwento sa kanilang mga bayarin sa kuryente.
Ito ay bilang pagtalima ng power distributor sa isla ng Romblon, Sibuyan, Corcuera at Banton sa ipinatutupad na batas ukol sa pagbibigay ng limang porsiyentong Senior Citizen discount sa mga nagkukunsumo ng 100 kwh pababa.
Sinabi ni Alma B. Regala, information officer ng Romelco na patuloy ang kanilang pagtanggap ng aplikasyon para sa mga magri-renew kung saan ay kinakailangan lamang na personal na magtungo sa kanilang tanggapan ang mga nakatatanda na dala ang kanilang Senior Citizen ID o kahit anumang valid ID at resibo sa kuryente.
Sa kasalukuyan aniya ay mayroong 748 na senior citizen sa kanilang nasasakupan ang nabi-benepisyuhan ng 5% na diskwento sa bayarin sa kanilang kinukonsumong kuryente kada buwan.
Sa mga nagnanais aniyang mag-apply ng kanilang Senior Citizen discount, dapat ay nakapangalan ang metro o resibo ng kuryente sa mag-a-apply na nakatatanda ng hindi bababa sa isang taon at kinakailangang kasalukuyang naninirahan ang senior citizen sa lugar na kanyang ina-aplayan
Ang application form para sa Senior Citizen discount ay maaaring makuha sa tanggapan ng Romelco at dapat may kalakip na barangay certification na nagpapatunay na sila ay lehitimong nakatira sa lugar, 2×2 picture, Senior Citizen ID na nakalagay ang petsa ng kapanganakan, may litrato at pinaka-latest na resibo ng kuryente. (DMM/PIA-MIMAROPA/Romblon)
