Nagpaalala ang Department of Education (DepEd) dito sa lalawigan sa mga guro na hindi dapat tanggihan ang mga magpapalista sa Early Registration dahil lang sa walang maipresentang Authenticated Birth Certificate mula sa Philippine Statistics Authority (PSA).
Ayon kay Schools Division Superintendent Roger F. Capa ng DepEd Division of Romblon, maaari namang tanggapin ang Birth Certificate mula sa Local Civil Registrar kung walang PSA authenticated nito. Kung wala talagang Birth Certificate, maaari nang tanggapin kahit Barangay Certification na naglalaman ng mga pangunahing impormasyon ng bata.
Nilalayon ng hakbang na ito ng DepEd na hindi magiging hadlang ang mga ganitong documentary requirements sa kanilang pagnanais na mapalawak ang access sa edukasyon upang mas lalong maisulong at mabigyan ng mas magandang kinabukasan ang bawat kabataang Pilipino.
Hindi naman daw ibig sabihin na ‘satisfied’ o kontento na dito ang DepEd dahil importante pa ring makapagsumite ng PSA-authenticated Birth Certificate para na rin sa permanenteng record ng bata. Maaari pa namang isumite ng mga magulang ng bata ang naturang dokumento sa unang araw ng pasukan o hanggang sa Agosto 2019.
Ayon pa sa opisyal ng DepEd Romblon, mahirap sa magkabilang panig na kung kailan magtatapos ang bata ay saka pa lamang isasaayos ang record nito.
Ang ayaw lang ng DepEd Romblon ay maging hadlang ang kawalan ng naturang dokumento para hindi mairehistro ang bata sa nasasakupan nitong 286 pampublikong eskwelahan sa buong lalawigan (217 sa elementarya, 45 sa sekondarya at 24 sa senior high school).
Ang Early Registration para sa School Year 2019-2020 ng mga papasok sa Kinder, Grade 1, Grade 7 at Grade 11 ay nagsimula noong Enero 26 na tatagal hanggang Pebrero 22, na may temang “Magpatala… Makapag – Aral Ay Karapatan Mo At Ng Bawat Pilipino”.
Ang maagang pagpapatala ay alinsunod sa kautusan ng kagawaran ng edukasyon o DepEd Memorandum Order No. 3 series of 2018 na naglalayong makuha ng maaga ang datos at impormasyon sa dami ng mga mag-aaral upang maging basehan ng nasabing ahensiya sa posibleng pagdagadag ng bilang ng mga guro, mga maaaring kakulangan sa paaralan, kagamitan sa pagtuturo, aklat at iba pang kailangang matugunan bago pa man sumapit ang pasukan.
Layunin din ng DepEd na maiwasan ang mga problema na maaaring kaharapin pagsapit ng pagbubukas ng klase sa Hunyo. Kinakailangan na malaman ng mga namumuno sa paaralan kung ilan ang kabuuang bilang ng mga papasok na estudyante upang makapaghanda ng maaga, makapagpatayo ng mga bagong silid aralan, mga silya at iba pang mga suliranin sa pagbukas ng klase sa susunod na school year.
Suspendido naman ang registration sa Pebrero 5 dahil sa pagdiriwang ng Chinese New Year na idineklarang regular at special non-working days.(DMM/PIA-MIMAROPA/Romblon)
