Nakakabig umano ng aabot sa P4.7 bilyong pork barrel fund si Romblon Rep. Emmanuel Madrona mula sa nabuking na P51 bilyong infrastructure allotment insertions ni Budget Sec. Benjamin Diokno sa ilalim ng pinanukalang 2019 national budget.
Ayon sa listahan na inilabas ni House appropriations committee Chairman at Camarines Sur Rep. Rolando ‘Nonoy’ Andaya Jr. na inulat ng pahayagang Abante, si Congressman Emmanuel Madrona ay nanguna sa listahan ng higit 60 mambabatas na umano’y pinaboran ng dating liderato ng Kamara sa ilalim ng napatalsik na dating House Speaker Pantaleon Alvarez at naghati-hati para sa mga infra project na inilatag ng tanggapan ni Diokno sa ilalim ng National Expenditure Program (NEP).
Batay sa listahan na isinumite ni Diokno sa Bicameral Conference Committee, si Madrona ay humakot ng aabot sa P4.747 bilyon mula sa P51 bilyon na umano’y galing sa last-minute insertions ni Diokno.
Ang sinasabing P4.747 bilyon ay iba pa sa regular na pondo na makukuha ng Romblon na aabot sa P2.023 bilyon. Kung susumahin, aabot sa P6.770 bilyon ang mga proyektong mapapasa-kamay ni Madrona kung hindi nabuking ng bagong liderato ng Kamara ang mga insertions at ‘parked pork’ na umano’y isiningit ng mga dating opisyales ng Mababang Kapulungan.
Si Madrona ay kapatid ni dating Rep. Eleandro Jesus Madrona, na nadawit at kinasuhan sa P4.8 milyong fertilizer scam.
Batay pa sa listahan, si dating Speaker Alvarez ay humakot ng P8.4 bilyon sa ilalim ng panukalang budget, kung saan higit P3 bilyon nito ay mula sa pondong isiningit ni Diokno.
Samantala, nakakuha din umano ng multi-bilyong alokasyon mula sa P51 bilyong insertions ni Diokno sila Abra Rep. JB Bernos at Albay Rep. Joey Salceda.
Ayon sa listahan ni Andaya, si Bernos ay humakot ng P4.1B samantalang P3.51 bilyon naman kay Salceda.
Sa mga naunang pahayag, sinabi ni Senator Panfilo Lacson na ang realigned budget na P51 billion ng government agencies ay isang ‘pork barrel' o discretionary funds.
Sa panayam naman ng Romblon News Network kay Madrona, nilinaw nito na ang naidagdag sa kanyang pondo ng opisina ni Budget Sec. Benjamin Diokno ay mapupunta sa mga proyekto ng mga national agencies sa lalawigan kagaya ng mga national roads, farm to market roads, at evacuation centers sa mga Barangay.
“Yung mga karagdagang pondo na yun ay yun yung mga request namin sa time ni Speaker Alvarez, at yun na nga, napagbigyan. Actually, malaking tulong sana yun sa Romblon,” ayon kay Congressman Madrona.
Sinabi rin nito na hindi na aabot sa P6.770 bilyon ang budget sa Romblon kundi nabawasan at may kabuoan nalang itong mahigit 3 bilyon pesos.
“Hindi na siya kasama pero may natira rin, yun yung mga importante at ipinaglaban ko talaga para sa probinsya ng Romblon. Isa rito yung tuloy-tuloy na pagsemento sa mga national roads, mga slope protection, at mga kalsada patungong tourist spots,” dagdag ni Madrona.
“Meron tayong budget para sa circumferencial road ng Sibuyan, San Jose, at Tablas, kalsada papuntang Tablas Point sa Santa Fe, at kaslada papuntang Garing Falls sa Odiongan,” pahayag pa ni Madrona.
Dahil ngayon umano ay nasa bicameral committee na ang kamara at senado, sinabi ni Madrona na sana ay makahingi pa siya ng dagdag pondo pa para sa lalawigan kagaya ng mga hiling ng mga barangay na covered court.
Read More: Rep. Madrona, nilinaw na ang dagdag sa budget ay para sa lalawigan
