Mukhang napapasarap ang tulog ng kapulisan ngayong malamig ang panahon dahil magpapasko kaya malakas ang loob ng mga alagad ni Taning na gumala at maghanap ng mahoholdap.
Kamakailan lang, ilang estudyante na sakay ng UV Express ang hinoldap sa Maynila at natangay ang mga mamahaling cellphone ng mga biktima kahit tirik ang araw. Ang matindi nito, nagiging mautak na rin ang mga mokong na holdaper dahil pinapaalis na nila ang mga password ng cellphone bago sila tumakas.
Ang siste, nakunan sa CCTV camera ang biyahe ng UV Express at doon nadiskubre na may kasabwat na dalawang nakasakay sa magkahiwalay na motorsiklo ang dalawang alagad ni Taning na nangholdap sa mga biktima.
Hindi lang natin alam kung nakunan din ng camera ang pagbaba ng mga holdaper sa UV Express at paglipat nila sa dalawang motorsiklo na kanilang kasabwat. Kung nakunan at kung may nagmomonitor sa CCTV, aba'y posibleng nahuli kaagad ang mga mokong.
Hindi ito ang unang pagkakataon na may pampasaherong sasakyan na hinoldap—umaga man, tanghali o gabi. Ang mga biktima ng holdap, tiyak na matinding trauma ang inabot at tiyak na matatakot na muling sumakay sa mga pampublikong sasakyan.
Ang mga ganitong insidente ang isa sa mga dahilan kaya marami ang pinipili na mangutang ng sasakyan kaysa mag-public transport. Kung tutuusin, kaya naman sigurong tiisin ng mga may sasakyan na makipagsiksikan sa public transport, magtiyaga sa trapik at mag-amoy pawis. Pero papaano nga naman ang kanilang seguridad lalo na kung gabi ang kanilang uwi?
Aba’y kung hindi sila mahoholdap, baka naman madukutan sila, o kaya naman eh mahablutan ng gamit sa kalye. Puwede rin silang makursunadahan at mabugbog ng mga adik o simpleng kabataan na naghahanap lang ng “trip.”
Sa Marikina nga, isang Masteral student ang pinaniniwalaan na hinoldap na, pinatay pa. Sa Quezon City, isang babae naman ang nabugbog at hinoldap din umano ng driver ng taxi na kaniyang sinakyan. Mabuti na lang at natusok niya ng sipilyo sa mata ang suspek kaya nakatakas ang biktima at nahuli ang mokong ang driver kinalaunan na nagpapagamot sa ospital.
Batid ng mga pulis na tumataas ang insidente ng holdapan kapag panahon ng kapaskuhan kaya dapat din sigurong gumawa sila ng taktika para maunahan ang mga kolokoy bago makagawa ng katarantaduhan. Hindi uubra ang lagi nilang payo na maging mapagmatyag dahil hindi naman talaga malalaman ng mga pasahero na holdaper ang kasama nila sa UV Express o bus o jeep, hanggat hindi ito naglalabas ng baril o patalim, at magdedeklara ng holdap.
Hindi rin uubra ang payo ng mga pulis na huwag nang maglabas ng cellphone, o ‘wag magsuot ng alahas o nang kung anumang makakatawag ng pansin sa mga alagad ni Taning. Aba’y parang “victim blaming” din ‘yan gaya ng payo sa mga babae na huwag magsuot nang maigsi, o ‘wag maglasing, o ‘wag dumaan sa madilim para hindi sila ma-rape.
Ang mabuti pa, paigtingin ang police visibility, damihan ang mga nagpapatrolyang pulis, at pakilusin ang mga “asset” para matimbog ang mga mokong na holdaper. Dapat turuan din ang mga tauhan ng barangay at city hall sa pagmonitor sa kanilang CCTV. Ano nga ba ang mga palatandaan na posibleng may gagawin o ginagawang kalokohan ang mga tao, rider o motorista na nakikita nila sa CCTV?
Gaya ng mga holdaper na tumira sa mga pasahero ng UV Express, posibleng magkakaangkas ang apat sa dalawang motorsiklo at bumaba ang dalawa sa kanila para sumakay sa UV Express. Kung nakunan sila ng CCTV at may nakapanood bago pa man nila ginawa ang panghoholdap, dapat bang maalerto o maalarma ang taga-barangay na may gagawin silang masama? Lalo na’t magkahiwalay sila ng pinuwestuhan sa UV Express. Ang isa raw kasi, puwesto sa gitna at sa hulihan naman ang isa pa, habang nakabuntot naman sa kanila ang dalawang kasamahan na nakamotorsiklo.
Siguro, isa ito sa mga dapat na tandaan ng mga pasahero; kapag galing sa motorsiklo ang sasakay sa kanila at pagkatapos ay bubuntot sa kanila ang motorsiklo, aba’y maalarma na sila. Pero teka, hindi ba may “radyo” ang mga driver sa UV Express, tanong ng ating kurimaw, nagamit kaya ‘yon para makahingi ng saklolo ang driver?
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
