Na-turn off ang isa nating kurimaw na patay na patay sa mga Korean dahil sa nabalitaan niya na hindi lang pala K-Pop fever ang dinadala nila sa Pilipinas kung hindi maging basura fever.
Namamaho kasi ngayon ang isang bakanteng lote sa Cagayan de Oro matapos mabisto ang tone-toneldang misdeclared na shipment na mula sa South Korea na pinalabas daw na mga plastic synthetic plates ang laman pero iyon pala ay mga pinaghalong toxic at biohazardous waste.
Hinanakit ng ating kurimaw, ganito raw ba kababa ang tingin ng ilang Korean sa Pilipinas? Ang gawing tapunan nila ng basura?
Hindi natin maaalis kung may mga kababayan tayo na katulad ng ating kurimaw ang sintemyento sa nadiskubreng mga imported na basura. Kasi naman, kasama ang mga Pinoy na lumaban noon sa Korean war para ipagtanggol ang South Koreans mula sa North Koreans.
Ngayon, maraming Pinoy ang sumasamba sa iba’t ibang K-pop groups at paborito na ring pasyalan ng mga Pinoy ang Korea. Sabagay, ganun din naman ang mga turistang Koreano na dumadagsa sa Pilipinas. Iyon nga lang, hindi naman siguro tayo nagpapadala sa kanila ng tone-toneladang basura.
Kung tutuusin, hindi ito ang unang pagkakataon mga tsong na may nadiskubreng basura na dumating sa Pilipinas mula sa South Korea. Noong unang bahagi ng 2017, tone-toneladang basura rin mula sa South Korea ang bumagsak sa tambakan ng basura sa Cebu naman.
Hindi na natin nabalitaan kung ano ang nangyari sa naturang mga basura sa Cebu kung naibalik pa ba sa South Korea. Pero kung walang nangyari noon, baka iyon ang dahilan kaya malakas ang loob ng kung sino man ang nasa likod ng pagdating ng mga basura ng South Korea sa CDO.
Mantakin n’yo, panay ang reklamo natin na sangkaterba na ang basura sa Pilipinas na napupunta na sa mga ilog at dagat, tapos ay may mga delikadong basura na galing sa ibang bansa na papasok pa sa atin. Alam kaya ng pamahalaan ng South Korea na tinatapunan nila ang basura ang itinuturing nilang BFF na Pilipinas?
Sabi ng isang opisyal mula sa Department of Environment and Natural Resources, pinapayagan naman na pumasok sa Pilipinas ang mga basura na tinatawag na “recyclable materials” gaya ng mga plastic flakes dahil nagagawa uli itong plastic. Ang kaso, ang dumating daw na mga basura ay may kasamang mga hazardous waste at iba pang materyales na basura talaga.
Ang malaki na naman tanong, anong gagawin natin sa mga basurang ito? Matutulad lang ba uli ito sa mga imported na basura na galing naman sa Canada noong 2013 na bumagsak sa Tarlac? Magkakaroon na naman ng imbestigasyon tapos mababasura rin kaya?
Ano bang nangyari sa mga taong nasa likod ng “pag-import” ng mga basura? May nakasuhan ba? At kung nakasuhan, naparusahan ba? Ang sabi sa mga ulat, nag-utos ang korte noong 2016 na ibalik sa Canada ang mga basura pero nga-nga lang ang mga nasa kinauukulan dahil ayaw nang tanggapin ng Canada ang basurang isinuka nila.
Ang tanong ng ating kurimaw, ilan ba kayang basura na mula sa ibang bansa ang pumapasok sa Pilipinas nang hindi lumalabas sa media at tahimik lang na nababaon sa lupa? Ilan pa nga ba? Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
