Anim na mangingisda galing Sitio Lipata, Brgy. Tungib, Buenavista, Marinduque ang naaresto ng mga tauhan ng Banton Municipal Police Station sa bayan ng Banton, Romblon matapos na mahuling iligal na nangingisda sa Bantoncillo Islet.
Kinilala ng Chief of Police ng Banton Municipal Police Station na si Police Senior Inspector Chisi Faderagao, ang mga suspek na sina Fernando Adelo y Ebaluan Jr, 33 yrs old; Alejo Sevilla y De Guzman, 25 yrs old; Christian Privado y Dilos Santos, 25 yrs old; Russel John Garay y Pastrana, 23 yrs old; Jerwin Privado y Dilos Santos, 25 yrs old, married, at Romel Sevilla y Cabillar, 27 yrs old.
Ayon sa pulisya nagsasagawa sila ng seaborne patrol sa municipal waters ng Banton bandang 9:30 ng gabi nitong Linggo ng makita nila ang mga suspek na nangingisda sa kanilang municipal waters gamit ang isang compressor at pamana.
Sinabi ni PSI Faderagao na nalabag ng mga mangingisda ang Comprehensive Municipal Fisheries and Environmental Code ng bayan ng Banton kaya sila hinuli.
Nahaharap sa kaukulang reklamo ang mga naarestong mangingisda.
Paalala ng Banton Municipal Police Station sa publiko na ugaliing sumunod sa mga ordinansa ng bayan.
