Kinikwestyon ng League of Municipalities of the Philippines (LMP) Romblon Chapter ang proposed 2019 annual development plan ng lalawigan ng Romblon na ipinasa ng Provincial Government sa Sangguniang Panlalawigan dahil wala umanong quorum ang ginanap na Provincial Development Council (PDC) noong Hunyo.
Sa panayam ng Romblon News Network kay Corcuera Mayor Rachel Bañares, presidente ng LMP-Romblon Chapter, sinabi nito na kinikwestyon ng majority ng mga alkalde ng Romblon validity ng ginanap na PDC dahil wala umano ang mga alkalde sa venue noong panahong iyon.
Paliwanag ni Bañares, bigla umanong ginawang Full PDC Meeting ang unang araw ng meeting imbes na ito ay isa lamang Pre-PDC kaya karamihan umanong mga alkalde ay absent o di kaya'y late ng dumating.
Una ng pinaliwanag ni Governor Eduardo Firmalo na hinintay umano nilang dumating ang mga alkalde hanggang alas-10 ng umaga ngunit late umano sila at dahil may mga representative naman umanong present ang mga LGU maliban sa Mayor, itinuloy nila ang Full Council Meeting.
Sinabi naman ni Bañares na itinanggi umano ng mga alkalde na pinayagan nila ang mga kawani ng mga LGU na nandun sa Pre PDC na maging representative ng mga Mayor sa Full Council Meeting.
Sa ginanap umanong pagpupulong ng League of Municipalities of the Philippines (LMP) Romblon Chapter, napagkasunduan ng majority na magpadala ng resolution sa Provincial Government at sa Sangguniang Panlalawigan upang pabulaanan at ipawalang bisa ang naganap na PDC Meeting. Dahil dito posibleng matagalan ang pagkakapasa sa konseho ng proposed 2019 budget ng probinsya ng Romblon.
Dahil sa nasabing issue ibinalik ng Sangguniang Panlalawigan sa Provincial Government ang ipinasa ng huli na 2019 Annual Development Plan para klaruhin ang hinaing ng mg alkalde. Sinabi naman ni Vice Governor Jose Riano na hindi umano apektado nito ang buong 2019 budget ng probinsya dahil advance sa due date naman umano silang nagsubmit ng mga requirments.
“Actually ang ibinalik lang namin ay ang Annual Development Plan, pero ang Annual Budget na ipinasa sa amin kahapon ay nasubmit na namin ngayong araw sa Committee on Budget and Appropriation para pag-usapan sa kanilang committee bago ito maipasa,” pahayag ni Riano ng makausap ng Romblon News Network.
“Hindi naman kasi pwede na [wag namin pansinin ang reklamo] ng Mayor's Leauge kasi ang 20%, ang ADP kasi ang mga miyembro niyan ang 17 Mayors,” dagdag ng Bise Gobernador.
Dagdag pa ng Bise Gobernador, wala naman umanong problema ito basta maayos umano agad ang gusot sa Mayor's Leauge at sa Provincial Government kaugnay sa Provincial Development Council (PDC) Meeting.
Wala pang bagong pahayag si Romblon Governor Eduardo Firmalo kaugnay sa nasabing balita.
