Sinuspende na ni Governor Eduardo ‘Lolong’ Firmalo base na rin sa rekomendasyon ng Provincial Disaster Risk Reduction Management Council (PDRRMC) ang mga klase sa lahat ng antas ng pribado at pampublikong paaralan sa lalawigan ng Romblon bukas, Biyernes, September 14, gayun na din ang mga pasok sa lahat ng pampubliko at pampribadong opisina bilang paghahanda sa posibleng epekto ng bagyong #OmpongPH sa lalawigan.
Ito ang napagdesisyunan ng Gobernador sa ginanap na pagpupulong Provincial Disaster Risk Reduction Management Council (PDRRMC) ngayong umaga sa kapitolyo.
Isasagawa rin ngayong alas-3 ng hapon ang simultaneous clean-up drive sa lahat ng bayan sa lalawigan para linisin ang mga kanal at drainage system para maiwasan ang biglaang baha.
Pinag-iingat rin ng Gobernador at ng PDRRMC ang mga mangingisda na magpapalaot pa ngayong hapon sa posibleng mataas na alon sanhi ng bagyong Ompong.
Sa pinakahuling taya ng Philippine Atmospheric, Geophysical and Astronomical Services Administration (PAGASA), kasalukuyang nasa 780 km East Northeast ng Guiuan, Eastern Samar ang sentro ng bagyong Ompong.
Taglay parin ni Ompong ang hangin nitong may lakas na 205 kph malapit sa gitna at may bugsong 255 kph.
