Nakipagpulong si Department of Health MIMAROPA Regional Director Mario Baquilod sa ilang matataas na opisyal ng lalawigan ng Romblon sa opisina ni Congressman Emmanuel Madrona sa House of Representatives nitong Huwebes ng umaga, August 09.
Ayon sa PR Team ni Congressman Madrona, napag-usapan sa pagpupulong ang lagay ng mga ospital sa lalawigan ng Romblon lalo na ang Romblon Provincial Hospital sa Odiongan at ang Sibuyan District Hospital sa bayan ng Cajidiocan.
Napag-usapan rin ang mga pwedeng ibigay na medical assistance ng Department of Health at iba pang health services para sa mga residente ng Romblon.
Kasama ring nakipagpulong sa Department of Health MIMAROPA si Vice Governor Otik Reano at ilang miyebro ng Sangguniang Panlalawigan na kamakailan lang ay pinayagan ang DOH-MIMAROPA at Provincial Government ng Romblon na pumasok sa isang memorandum of agreement para sa pagpapaganda pa ng mga pasilidad sa mga ospital sa buong lalawigan.
