Dapat isabit sa angkla at isama sa ilalim ng Benham o Philippine Rise kung sinuman ang nagpakulo na pupunta umano si Pangulong Mayor Duterte sa naturang bahagi ng karagatan at magje-jet ski pa habang may watawat ng Pilipinas.
Sa totoo lang, inilagay lang nila ang presidente sa alanganing sitwasyon at nagmistulang katatawanan dahil sa naturang pakulo. Una, alam naman ng mga Pinoy na walang umaangkin sa Philippine Rise kahit pa nagbigay ng pangalan ang Tsina sa ilang “features” sa ilalim ng dagat. Kaya naman walang saysay kung ipagdidiinin pa na sa Pilipinas ito.
Pangalawa, nakalimutan ba nila na ipinangako ni Duterte [na kinalaunan ay inamin niyang biro lang] na magje-jet ski siya sa West Philippine Sea na siyang inaagaw sa atin ng China. Kaya naman nang lumabas ang mga abiso na baka mag-jet ski si President Mayor sa Philippine Rise, aba’y maraming kurimaw na hindi marunong lumangoy ang tumaas ang kilay.
Ang matindi nito, hindi naman pala tumuloy si Pangulong Mayor sa Philippine Rise at tumigil lang ang barko niya sa karagatang sakop ng Aurora, ang lalawigan kung saan malapit ang Philippine Rise. Ang matindi pa, tumuloy naman ang pambansang “photobomber” ng Malacanang sa pag-jet ski na may watawat ng Pilipinas kasama si Baste Duterte. Sa mga unang larawan na lumabas, aba’y aakalain mong sa bahagi sila ng Philippine Rise nagpakitang-gilas, iyong pala, nasa Casiguran Bay lang sila na ilang kilometro pa ang layo sa Philippine Rise.
Puna tuloy ng mga kurimaw na umaaray sa sunod-sunod na oil price hike, nagsayang lang krudo ang pambansang photobomber sa kagustuhang magkaroon ng pasikat stunt dahil nag-aambisyong tumakbo sa 2019 elections. Aba’y hindi lang mahal na krudo ang inaksaya nila, inabala pa nila ang Philippine Navy na nagbigay sa kanila ng ayuda.
Malamang na nagtatawanan din ang mga Tsino nang nalaman nila ang pakulo sa Philippine Rise, gayung ang inaagaw nila ay ang West Philippine Sea, na nasa kabilang bahagi ng Pilipinas. Sabi nga ng isang propesor, ang nangyari sa naturang sablay na pakulo ay parang dumepensa ang pamahalaan sa likod ng bakuran ng bahay, gayung ang inaagaw ng kapitbahay ay iyong nasa harapan ng bahay.
Maganda sana kung ipinayo na lang nila kay Pangulong Mayor na pangunahan ang send-off ceremony sa mga Pinoy scientist na magsasagawa ng masusing pag-aaral sa Philippine Rise, at ang pagdeklara niya sa lugar bilang protected area…period! Ang kaso, dahil mayroon sigurong iba na gusto gumawa ng pakulo para sumikat, may pa-jet ski effect pa silang naisip na sumablay tuloy at naging katatawanan. Baka ang mga ka-DDS, hindi natuwa.
Bukod dito, siguro ay natauhan din ang isa pang mataas na opisyal sa Malacanang na nagsabi noon na walang kakayahan ang mga Pinoy na magsagawa ng pagsusuri sa Philippine Rise kaya pinayagan ang Palasyo ang mga Chinese scientist na magsagawa ng research sa naturang lugar.
Yes, bago ang pagpapadala ni Pangulong Mayor ng mga Pinoy scientist sa Philippine Rise, nauna na sa kanila ang mga Tsino noong pang Enero. Kahit pa itanong nyo yan sa kalihim na funny-walain sa China, at ang isang opisyal na nag-aambisyon sa 2019 na nang-insulto sa mga kababayan nating scientists.
Tandaan: Ang tao'y nilalang na politiko pero mas madalas ang politiko'y nanlilinlang ng tao!
(Twitter: follow@dspyrey)
