Hindi lang sa operasyon kontra sa iligal na droga at pagsawata ng krimen ang ginagawa ng mga kapulisan sa Pilipinas.
Sa bayan ng San Andres, Romblon; tinitingala ngayon ang daawang pulis ng mga kapwa nito pulis matapos na magsauli ng aabot sa P42,000 sa isang babaeng nakawala nito.
Ito ay sina SPO1 Rodel Guro at si PO2 Rene Noche ng San Andres Municipal Police Station.
Pasado alas-5 ng madaling araw sa saling-sing road sa bayan ng San Agustin ng madaanan ng dalawa ang isang lalaking naghahanap umano ng nahulog niyang black pouch sa kalsada. Tumigil ang dalawa at tumulong maghanap ngunit dahil sa dilim sa lugar, nagpasya silang dumiretso nalang sa pantalan ng San Agustin para maghatid ng mga file folders.
Nang pabalik na ang dalawa sa istasyon ng magliwanag, muli nilang nadaanan ang saling-sing road at nagpasya silang subukang hanapin ang black pouch.
May napansin ang dalawa at agad na tiningnan kung ito ang black pouch na hinahanap ng lalaki.
Pagbukas nila, nakita nila ang isang cellphone, at pera na nagkakahalaga ng P42,000.
Napag-alaman ng dalawa na ang may-ari ng pouch ay si Janet Flores ng Barangay Balogo, Calatrava, Romblon. Dito na sila nakipag-kita kay Mrs. Flores sa Barangay Hall ng Balogo para isauli ang pouch at ang mga laman nito.
Ayon sa San Andres MPS, ang action na ginawa ng dalawa ay commendable dahil sa pagpapakita nila ng katapatan.
Nagpasalamat naman si Janet Flores sa dalawang pulis dahil sa ipinakita nitong kabaitan at pagiging tapat sa kanilang serbisyong sinumpaan.
