Sunud-sunod ang good news sa lalawigan ngayon. Nakakatuwang isipin na matapos buhusan ng pondo ni dating Pangulong Noynoy Aquino ang Romblon para sa pagpapagawa ng mga pangunahing lansangan sa buong probinsiya na umabot sa humigit-kumulang P3 bilyong piso sa nakalipas na anim na taon, ipinagpapatuloy ang implementasyon ng mga imprastraktura sa enerhiya at turismo.
Sa usapin ng pagpapailaw sa mga kanayunan, dumating na ang pitong units ng malalaking generator sets para sa mga planta ng National Power Corporation (NPC) sa lalawigan. Pakikinabangan ng tatlong bayan sa Sibuyan Island ang tatlo sa mga ito.
Isang karagdagang Napocor gen-set ang naihatid na sa island municipalities ng Concepcion, Corcuera at Banton. Pihadong ligtas na rin sa paminsan-minsang brown-out ang kabiserang bayan ng Romblon sa pagdating ng panibagong makinang may kapasidad na 600kilowatt.
Kahit papaano'y mababawasan na ang mga mangungulit ng tawag kina Napocor District Manager Ricky Umban at GM Rene Fajilagutan.
Mula sa enerhiyang predictable at dependable, nakikinitang magsusulputan ang mga bagong negosyo at masususugan na rin ang hanapbuhay sa pangingisda sa mga bayang nabanggit.
Ayon sa pamunuan ng Romblon Electric Cooperative (ROMELCO) Inc., sa sandaling tuluyan nang maisama sa Sibuyan power grid ang tatlong generator set na ibabase sa San Fernando ay magkakaroon na ng sapat na suplay ng kuryente sa buong isla ng Sibuyan at maiibsan na ang rotating brownout na dinaranas sa tatlong munisipyo ng Sibuyan.
Malapit na ring maramdaman ang epekto ng flagship budget innovation ng panguluhang Aquino – ang bottom's up budgeting o BUB.
Sa Tablas Island, mag-uumpisa na ang konstruksyon ng mala-Noah's Ark na Evacuation Center sa bayan ng San Agustin matapos ang isinagawang simbolikong turn-over ng pondong pampatayo sa nasabing proyekto sa pagitan ni San Agustin Mayor Esteban Madrona at ni Department of Interior and Local Government Assistant Regional Director Karl Caesar Rimando.
Maliban sa mga proyektong pang-imprastraktura, bigyan sana ng karampatang atensyon ang ganitong mga pagawa na nakatuon sa climate change mitigation at adaptation.
Palarin sana tayong muling mabiyayaan ng mga proyektong sasalba ng buhay at magpapababa ng masamang epekto ng pabagu-bagong panahon.
Ang banta ng nagbabagong klima ay hindi na lamang nasa hinuha ng mga siyentipiko o haka-haka. Ramdam na ito lalung-lalo na sa mga archipelagic provinces o mga pulu-pulong lalawigan gaya ng Romblon.
Bagyong Feria noong 2009 ang nagpalubog sa pinakamalaking passenger vessel sa bansa noon – ang Princess of the Stars.
Lingid sa kabatiran ng karamihan, maliban sa nasabing sakuna, maraming bayan malapit sa dalampasigan ang napinsala noon, kung saan halos daan-daan milyong halaga ng pampublikong imprastraktura ang nasira lalo na sa mga bayan ng San Agustin, Sta. Maria, Alcantara, Looc hanggang Odiongan.
Magsilbi sanang babala ang mga pangyayaring ito sa mga opisyal ng gobyerno. Panahon na upang pagtuunan ng polisiya at alokasyon ang banta ng klima. Tandaan: Man is a political animal! (Twitter: follow@dspyrey)
