Naitampok sa isang pandaigdigang pagtitipon ng Simbahang Katolika sa Rome, Italy ang panawagan ng mga komunidad sa Sibuyan Island laban sa mapanirang pagmimina at para sa pangangalaga ng likas na yaman at biodiversity ng isla.
Ibinahagi ng Filipino environmental advocate na si Rodne Galicha ang karanasan ng mga komunidad sa Sibuyan sa pagdiriwang ng ikalimang anibersaryo ng Laudato Si’ Action Platform (LSAP) ng Vatican na ginanap noong Nobyembre 4 hanggang 6.
Sa isang pahayag nitong Sabado, Nobyembre 7, sinabi ni Galicha, executive director ng Living Laudato Si’ Philippines at national convener ng Aksyon Klima Pilipinas, na binigyang-diin niya ang kahalagahan ng pakikilahok ng mga lokal na komunidad sa mga desisyong may epekto sa kanilang teritoryo at likas na yaman.
Sa panel discussion na may pamagat na “What Makes Community Transformation Last?”, ibinahagi ni Galicha ang karanasan ng Pilipinas sa pagsasabuhay ng konsepto ng *integral ecology* ni Pope Francis, kabilang ang pagkilos ng mga residente ng Sibuyan laban sa mga aktibidad ng pagmimina na itinuturing nilang banta sa kapaligiran.
“Five years with LSAP have taught us: transformation lasts when faith becomes a shared way of life, not simply a project,” ani Galicha.
Binigyang-diin din niya na dapat magkaroon ng aktibong papel ang mga komunidad sa pagbuo ng mga desisyon at hindi lamang maging tagatanggap ng tulong mula sa mga organisasyon.
Kilala ang Sibuyan Island sa mayamang biodiversity, kagubatan at mga watershed nito. Patuloy na nananawagan ang ilang grupo at residente sa isla laban sa mga aktibidad ng pagmimina dahil sa pangamba sa posibleng epekto nito sa kanilang kapaligiran.
Kabilang din sa mga lumahok sa pagtitipon sina Bishop Allwyn D’Silva ng India, Daud Jibon Das ng Caritas Bangladesh at Ivan Efreaim Gozum ng University of Santo Tomas, na tumalakay sa pananagutan ng Simbahan sa pangangalaga ng kalikasan at sa mga epekto ng artificial intelligence sa kapaligiran.
