Walong daan at animnapu’t pitong indigent senior citizen sa bayan ng Romblon ang tumanggap kamakailan ng kanilang social pension mula sa pamahalaang lokal.
Ang mga tauhan ng Municipal Social Welfare and Development Office ay isa-isang pinuntahan ang 31 barangay sa bayan ng Romblon upang personal na ipamahagi ng ayudang pinansyal sa mga nakatatanda.
Nagsagawa rin ng maikling lecture at paliwanag ang MSWD hinggil sa inamyendahang batas sa pagpapatupad ng programang ito.
Sinabi ni Ma. Lourdes M. Fajarda, Municipal Social Welfare and Development Officer, patuloy ang isinasagawang pamimigay ng pamahalaan bayan ng Romblon ng social pension sa mga mahihirap na nakatatanda.
May kabuuang Php 1,300,500 ang ipinamahagi ng MSWDO dahil ang bawat benepisyaryo ay tumatanggap ng tig-Php 500 kada buwan at ang kanilang tinanggap ay kabayaran para sa buwan ng Enero hanggang Marso ngayong taon.
Ang programang Local Social Pension for Indigent Senior Citizen ng DSWD ay alinsunod sa R.A. No. 9994 o Expanded Senior Citizens Act of 2010 na nag-aatas sa lokal na pamahalaan na pagkalooban ng buwanang pensyon ang mga kapus-palad na nakatatanda sa lokalidad upang matugunan ang mga pangangailangan ng mga ito partikular ang pagkain at gamot.
Sakop ng batas na ito ang mga mahihirap o indigent senior citizens na mahina na, sakitin, may kapansanan at walang natatanggap na pension o permanenteng pinagkukunan ng kita o suporta sa miyembro ng pamilya.
Ang mga naturang senior citizens ay nakapasa sa requirement ng DSWD National Household Targeting System for Poverty Reduction kung kaya nakasama sa talaan ng mga pensioners.
