Pinagungunahan ng Office of the Mayor sa pakikipagtulungan ng Office of the Municipal Agriculturist, Municipal Social Welfare and Development Office at Municipal Nutrition Action Officer ang pagdiriwang ng Buwan ng Nutrisyon ngayong Hulyo.
Taglay ng pagdiriwang ngayon ang temang: “First 1000 days ni Baby, Pahalagahan para sa Malusog na Kinabukasan.”
Ang programang ginanap noong Hulyo 27 sa public plaza ay nilahukan ng mga empleyado ng munisipyo, mga guro at mag-aaral mula sa Romblon National High School, Macario Molina National High School, Romblon West Central School, Romblon East Central School at mga Child Development Center.
Ayon kay MSWD Officer Ma. Lourdes M. Fajarda, ang pagdiriwang ay naglalayong itaas ang kamalayan ng publiko sa kahalagahan ng tamang pagpapakain sa mga sanggol, partikular sa paraan ng pagpapasuso para sa malusog na paglaki nito. Layunin din ng taunang pagdiriwang na mabigyan ng kamalayan ang bawat Pilipino at hikayatin sila na bigyang-atensyon ang kahalagahan ng wastong nutrisyon.
Dagdag pa ni Fajarda na kanilang papalaganapin ang mga benepisyo at kahalahagan ng pagpapasuso sa mga sanggol dahil makatutulong ito nang malaki para sa kalusugan ng bata.
Kasabay rin ng selebrasyon ang pagbubukas ng Agri-Trade Fair bilang bahagi pa rin ng selebrasyon ng Nutrition Month. Mabibili dito ang iba't ibang mga gulay, prutas at iba pang uri ng produktong galing sa bukirin.
