Idinaan sa harana ng mga kapulisan ng Concepcion Municipal Police Station ang kanilang pagbati ng ‘Happy Valentine's Day' sa mga residente ng Concepcion, Sibale Island, Romblon nitong bisperas ng araw ng mga puso.
Isa sa mga binisita ng mga kapulisan sa pangunguna ng kanilang hepe na si Police Inspector Agustin Aban, ay ang isang senior citizen na hirap na makalakad. Binigyan nila ito ng bulaklak habang kinakantahan ng valentine's song. Sa sobrang tuwa, naiyak ang matanda at nagpasalamat sa mga kapulisang humarana sa kanya.
Sa isa pang bahay, hinarana rin ng mga kapulisan ang isang babaeng nag-iisa nalang sa kanyang bahay matapos mamayapa ang kanyang asawa. Binigyan ito ng mga kapulisan ng bulaklak, at litrato nilang mag-asawa na nakalgay sa isang frame habang kinakantahan ng kanilang themesong.
Ayon sa Concepcion Municipal Police Station, ang target ng kanilang harana ang mga balo o kinuha na ng Panginoong Hesus ang mga asawa.
Gusto umano nilang iparamdam sa mga balo, na hindi malungkot ang Valentine's Day kahit iniwan na sila ng kanilang mga karelasyon.
