Pinalawak ang kaalaman at kasanayan ng mga tourism stakeholders sa San Jose, Romblon sa larangan ng product photography at paggamit ng digital applications sa isinagawang pagsasanay noong Nobyembre 12.
Dinaluhan ang Product Photography and Digital Applications Training ng mga kinatawan mula sa iba't ibang sektor ng turismo, kabilang ang mga accommodation establishment, tourist attraction, souvenir producer at community tour guide.
Sa pamamagitan ng mga aktuwal na pagsasanay at talakayan, natutuhan ng mga kalahok ang mga pamamaraan sa pagkuha ng mas kaakit-akit na larawan ng kanilang mga produkto at paggamit ng mga digital application tulad ng Canva at CapCut upang mapahusay ang kanilang promotional materials.
Isinagawa ang aktibidad sa pakikipagtulungan ng Department of Trade and Industry (DTI) Romblon sa pamamagitan ng Negosyo Center San Jose, sa pangunguna nina resource speaker Clinton Solidum at Negosyo Center Business Counselor Rica Joy Ojeñar.
Layunin ng pagsasanay na mapalawak ang digital skills ng mga tourism stakeholders upang mas maipakilala at maipromote ang kanilang mga produkto, serbisyo at destinasyon sa mas malawak na audience.
Inaasahang makatutulong ang naturang inisyatiba sa pagpapalakas ng online presence ng mga lokal na negosyo at sa pagpapakilala ng mga atraksyon at produktong panturismo ng Carabao Island sa mas maraming potensyal na bisita.
