Arestado ang sampung indibidwal matapos maaktuhan umano sa paglabag sa mga ordinansa kaugnay ng pangingisda sa karagatan ng Barangay Lonos, Romblon, Romblon.
Pinangunahan ng Romblon Maritime Police Station (MARPSTA) ang operasyon katuwang ang Romblon Coast Guard Station, Romblon Municipal Police Station at Romblon Bantay Dagat.
Isinagawa ang seaborne patrol operations at spot inspection kasunod ng ulat mula sa isang concerned citizen bilang bahagi ng pinaigting na kampanya laban sa ilegal na pangingisda.
Nasamsam sa operasyon ang dalawang motorized fishing banca, isang Yamada 12-horsepower engine at isang fishing net na may tinatayang kabuuang halaga na ₱65,000.
Dinala ang mga naarestong indibidwal at nakumpiskang kagamitan sa tanggapan ng Romblon MARPSTA para sa dokumentasyon at iba pang proseso bago isangguni sa Municipal Agriculture Office (MAO) para sa kaukulang aksyon.
Nahaharap ang mga indibidwal sa mga paglabag sa Sections 82 at 83 ng Romblon Municipal Ordinance No. 12-2006, Series of 2006 at pagmumultahin.
Tiniyak naman ng Romblon MARPSTA na magpapatuloy ang pakikipagtulungan nito sa mga kinauukulang ahensya at lokal na pamahalaan upang mapangalagaan ang yamang-dagat, maprotektahan ang kabuhayan ng mga mangingisda at mapanatili ang kaayusan sa karagatan ng lalawigan.
