Apat na katao ang nasugatan sa dalawang magkahiwalay na insidente ng aksidente sa kalsada sa mga bayan ng Odiongan at Romblon noong Setyembre 5 at 6, ayon sa Romblon Police Provincial Office (RPPO).
Sa Odiongan, dakong alas-7 ng gabi noong Setyembre 5, naganap ang isang sideswipe collision sa National Road sa Barangay Tulay na kinasangkutan ng isang nakaparadang Toyota Avanza at Honda TMX motorcycle na may sidecar.
Batay sa paunang imbestigasyon, patungo sa Barangay Mayha ang motorsiklo nang umano'y hindi mapansin ng 43-anyos na driver nito ang nakaparadang sasakyan at sumagi rito.
Sugatan din ang 57-anyos nitong pasahero. Kapwa sila dinala sa Romblon Provincial Hospital para sa kaukulang atensiyong medikal.
Ayon sa pulisya, hindi umano nakapagpakita ng driver's license ang driver ng motorsiklo. Hindi pa matukoy ang halaga ng pinsala sa dalawang sasakyan, habang dinala ang motorsiklo sa Odiongan Municipal Police Station para sa dokumentasyon at kaukulang disposisyon.
Samantala, isa pang aksidente ang naganap dakong alas-2:15 ng madaling araw noong Setyembre 6 sa National Road sa Barangay Ginablan, bayan ng Romblon.
Kinasangkutan ito ng isang motorsiklo at isang nakaparadang mixer truck. Sakay ng motorsiklo ang 23-anyos na estudyante na residente ng Barangay Capaclan bilang driver at 32-anyos na seaman mula Barangay Li-o bilang back rider.
Batay sa paunang imbestigasyon, pauwi umano ang dalawa mula sa isang pagdiriwang ng pista nang bumangga ang motorsiklo sa kanang likurang bahagi ng nakaparadang mixer truck.
Iniulat din na walang nakitang nakatalagang Early Warning Device (EWD) ang mixer truck at hindi ito ganap na naiilawan. Ayon pa sa paunang impormasyon, nakainom umano ng alak ang mga sakay ng motorsiklo bago ang insidente.
Kapwa nagtamo ng malubhang pinsala ang dalawang motorcycle rider at back rider at isinugod sa Romblon District Hospital para sa gamutan.
Samantala, muling nagpaalala ang Romblon PPO sa mga motorista at iba pang road users na mahalaga ang disiplina at pag-iingat sa kalsada upang maiwasan ang mga aksidente.
Kabilang sa mga paalala ng pulisya ang hindi pagmamaneho kapag nakainom, pag-iwas sa pagparada sa mga lugar na maaaring makaabala o magdulot ng panganib sa ibang motorista, at paggamit ng tamang warning devices at ilaw kapag kinakailangang huminto sa kalsada.
Hinimok din ang mga motorista na sumunod sa speed limit, panatilihin ang ligtas na distansya at manatiling alerto habang nagmamaneho.
Bahagi ito ng LIGTAS KALSADA Program ng Romblon PPO na naglalayong itaguyod ang responsableng paggamit ng kalsada at mas ligtas na paglalakbay sa lalawigan, sa ilalim ng panawagang “Disiplina sa Daan, Kaligtasan ng Mamamayan.”
