Personal na inihatid ni Sangguniang Bayan Member Manuel Fernandez Jr. ang kopya ng resolusyon ng Sangguniang Bayan ng Odiongan sa Maritime Industry Authority (MARINA) noong Martes ng umaga upang hilingin na maisama ang rutang Odiongan-Batangas at Batangas-Odiongan sa Sea-Based Service Contracting Program (SCP) ng Department of Transportation (DOTr).
Layunin ng resolusyon na maisama ang nasabing ruta sa programa ng pamahalaan na nagbibigay ng subsidiya sa pamasahe para sa mga kalahok na operator ng sasakyang pandagat at panlupa.
Ayon kay Fernandez, kapag naaprubahan ng MARINA ang kahilingan, maaaring makatanggap ng diskuwento sa pamasahe ang mga pasahero ng barkong bumibiyahe sa pagitan ng Odiongan at Batangas.
Ang SCP ay ipinatutupad ng pamahalaan upang makatulong sa publiko sa harap ng epekto ng pagtaas ng presyo ng langis na dulot ng mga kaguluhan sa Gitnang Silangan.
Matatandaang dalawang beses nang nagkaroon ng pagtaas sa pasahe ng barkong bumibiyahe sa rutang Odiongan-Batangas at pabalik.
Nagpasalamat naman si Fernandez sa mga miyembro ng Sangguniang Bayan ng Odiongan at kay Vice Mayor Tranquilino “Butchoy” Arevalo sa kanilang suporta sa naturang resolusyon.
Inaasahan na sasailalim sa pagsusuri ng MARINA ang kahilingan para sa posibleng pagsasama ng ruta sa Sea-Based Service Contracting Program.
Discussion about this post