Isang menor de edad ang nasawi matapos malunod sa dagat sa Sitio Santa Ana, Brgy. Tumingad, Odiongan noong Abril 26, ayon sa ulat ng pulisya.
Batay sa imbestigasyon ng Odiongan Municipal Police Station, bandang alas-11:00 ng umaga nang magtungo ang biktima kasama ang kanyang pamilya sa nasabing lugar upang maligo sa dagat.
Dakong alas-12:18 ng tanghali, habang abala sa pag-uusap ang mga kasama ng biktima, hindi nila namalayan na nakapunta na ito sa mas malalim na bahagi ng dagat na may malakas na agos. Makalipas ang ilang minuto, napansin nilang nawawala na ang bata.
Agad na nagsagawa ng paghahanap ang pamilya at natagpuan ang biktima sa malalim na bahagi ng dagat na wala nang malay. Kaagad itong isinugod sa Romblon Provincial Hospital sakay ng traysikel.
Gayunman, idineklarang dead on arrival ang biktima dakong alas-12:37 ng tanghali.
Naipabatid ang insidente sa pulisya sa pamamagitan ng 911 call bandang alas-12:23 ng tanghali, kung saan agad nakipag-ugnayan ang mga awtoridad sa tumawag at kinumpirmang nadala na sa ospital ang biktima.
Patuloy ang paalala ng pulisya sa publiko na mag-ingat sa pagligo sa dagat, lalo na sa mga lugar na may malalakas na alon at agos, at tiyaking may sapat na pagbabantay sa mga bata upang maiwasan ang kahalintulad na insidente.
Discussion about this post