Magbibigay ang pamahalaan ng tig-₱200,000 pondo sa bawat barangay sa buong bansa sa ilalim ng programang Bawat Barangay Makinabang, ayon sa anunsyo ni Pangulong Ferdinand R. Marcos Jr..
Pinangunahan ng Pangulo ang pamamahagi ng tulong pinansyal sa mga benepisyaryo sa Pilar, Bataan bilang bahagi ng ₱8 bilyong pondo para sa 42,000 barangay na layong matulungan ang mga komunidad na makayanan ang epekto ng krisis sa Gitnang Silangan.
Ayon kay Ralph Recto, maaaring gamitin ng mga barangay ang kalahati ng ₱200,000 para sa mga proyektong pangkaligtasan at imprastraktura tulad ng street lights, patrol vehicles, closed-circuit television cameras, at power generators para sa health centers at evacuation centers.
Ang natitirang ₱100,000 naman ay nakalaan para sa “finisher program” na tutulong sa mga college seniors upang matiyak na makapagtapos sila ng pag-aaral sa kabila ng epekto ng pagtaas ng presyo ng langis at iba pang gastusin. Inaasahang makikinabang dito ang humigit-kumulang 200,000 graduating college students.
Target ng pamahalaan na maipamahagi ang tulong sa lahat ng benepisyaryong barangay bago matapos ang Hunyo upang magamit ang pondo sa loob ng taon. Makikipagtulungan ang pamahalaan sa Liga ng mga Barangay para sa pagpapalabas ng pondo, habang babantayan ng Department of the Interior and Local Government ang implementasyon ng programa at pagsunod sa mga alituntunin sa paggamit ng pondo.
