Namahagi ng educational incentives ang Pamahalaang Lokal ng Odiongan para sa lahat ng Senior High School graduating students sa bayan, bilang bahagi ng suporta nito sa sektor ng edukasyon.
Aabot sa humigit-kumulang 950 mag-aaral mula sa mga pampubliko at pribadong paaralan ang nakatanggap ng naturang tulong pinansyal.
Dumalo sa pamamahagi si Roger Fodra Jr., alkalde ng Odiongan, na muling nagpatibay ng kanyang suporta sa mga kabataan at sa pagpapalakas ng edukasyon sa bayan.
Ayon kay Egnr. Reden Escarilla, Youth Development Officer III, layunin ng programa na hikayatin at suportahan ang mga mag-aaral na tapusin ang kanilang pag-aaral sa senior high school.
“Ang Educational Incentives Program para sa mga Senior High School students ng Odiongan, na nagsimula noong 2025, ay naglalayong suportahan at hikayatin ang mga mag-aaral na ipagpatuloy at matapos ang kanilang sekondaryang edukasyon,” ani Escarilla.
Dagdag pa niya, hindi lamang pinansyal na tulong ang naibibigay ng programa kundi pagkilala rin sa pagsisikap ng mga estudyante.
“Sa pamamagitan ng tulong pinansyal at pagkilala sa kanilang pagsisikap, hinihikayat ng programa ang kahusayan sa akademiko bilang munting regalo ng pamahalaan,” dagdag niya.
Nakakatulong din aniya ang programa upang mabawasan ang gastusin ng mga pamilya, lalo na sa mga pangangailangan sa pagtatapos ng mga mag-aaral.
“Nababawasan din nito ang pasanin ng mga pamilya, lalo na sa mga gastusin sa graduation, at isinusulong ang mas malawak na akses sa dekalidad na edukasyon,” paliwanag ni Escarilla.
Samantala, tiniyak naman ni Mayor Fodra na magpapatuloy at lalo pang palalakasin ang mga programang pang-edukasyon para sa mga kabataang Odionganon.
