Muling nanawagan ang mga residente ng Sibuyan Island sa Romblon sa Department of Environment and Natural Resources (DENR) na agarang aksyunan ang kanilang petisyon para kanselahin ang kontrata sa pagmimina ng Altai Philippines Mining Corporation (APMC), kasabay ng paggunita sa ikatlong anibersaryo ng itinayong barikada laban sa operasyon ng kumpanya.
Ayon sa mga miyembro ng grupong Sibuyanons Against Mining (SAM), halos isang taon na ang nakalipas mula nang ihain nila ang petisyon sa DENR para sa kanselasyon ng Mineral Production Sharing Agreement (MPSA) ng Altai Mining, subalit wala pa rin umanong tugon o pormal na aksyon ang ahensya hanggang sa kasalukuyan.
Ipinunto ng grupo na ang paggunita sa anibersaryo ng barricade ay sumasalamin sa patuloy at matibay na paninindigan ng mga komunidad sa Sibuyan na tutulan ang pagmimina sa isla.
Giit ng mga residente, magpapatuloy ang kanilang paglaban sa pamamagitan ng mga mapayapang pagkilos at pagbabantay hanggang tuluyang mapaalis ang mining company sa kanilang lugar.
Matatandaang noong Enero 24, 2023 ay nagtayo ng barikada ang mga residente upang pigilan ang pagbiyahe ng nickel ore ng Altai Mining. Iginiit ng mga komunidad na ilegal ang operasyon ng kumpanya dahil sa kakulangan umano ng mga kinakailangang permit. Dahil dito, nagpalabas ang DENR ng Cease and Desist Order laban sa Altai Mining matapos umanong matukoy ang iba’t ibang paglabag.
Noong Marso 4, 2025, naghain ng pormal na petisyon sa DENR ang mga lider ng komunidad para ipawalang-bisa ang MPSA ng kumpanya. Ayon sa mga environmental group na sumusuporta sa laban ng Sibuyan, nakapagtataka ang patuloy na kawalan ng aksyon ng DENR gayong ang mismong ahensya ang naglabas ng kautusan na nagpapahinto sa operasyon ng kumpanya dahil sa mga paglabag tulad ng kawalan ng Environmental Compliance Certificate, foreshore lease agreement, at ilegal na pagputol ng mga puno.
Binatikos din ng ilang environmental advocates ang umano’y kawalan ng malinaw na political will ng pamahalaan upang papanagutin ang mga mining company na lumalabag sa batas.
Patuloy namang hinihimok ng mga residente at mga grupong pangkalikasan ang DENR na pakinggan ang panawagan ng mamamayan at tuluyan nang kanselahin ang kontrata ng Altai Mining bilang hakbang sa pangangalaga sa kalikasan at kabuhayan ng mga taga-Sibuyan.
