Walang inilaan na pondo para sa promosyon at operasyon ng Municipal Tourism Office ng San Fernando, Romblon sa 2026 budget ng lokal na pamahalaan, matapos tanggalin ng Sangguniang Bayan ang mahigit ₱2.4 milyon na panukalang pondo para sa nasabing tanggapan.
Batay sa datos na inilabas ng San Fernando Public Information Office, tanging pasahod lamang ng isang regular na empleyado ang inaprubahan sa 2026 budget ng Municipal Tourism Office na nagkakahalaga ng ₱583,996.
Dahil dito, tuluyang tinanggal sa budget ang maintenance and operating expenses ng tanggapan na sana’y gagamitin para sa iba’t ibang gawain at programa, kabilang ang pagsasaayos at pangangalaga ng Cantingas River Resort, Casa del San Fernando, at iba pang proyektong pangturismo ng bayan.
Kasama rin sa mga tinanggal na pondo ang pambili ng office supplies, bayad sa telepono at internet, at subscription sa editing software. Inalis din ang humigit-kumulang ₱120,000 na pondo na nakalaan sana para sa Tourism Councils ng 12 barangay ng San Fernando.
Sa isang Facebook Live, ipinaliwanag ni Committee on Tourism Chairman Marcial Riano ng Sangguniang Bayan ng San Fernando na minabuti umano nilang bawasan ang operational expenses ng Municipal Tourism Office dahil, ayon sa kanila, mas maraming ahensya ng lokal na pamahalaan ang may mas agarang pangangailangan.
Ayon kay Riano, kabilang sa mga binigyang-prayoridad ang senior citizens, Municipal Social Welfare and Development Office (MSWDO), at mga health center ng bayan.
Dagdag pa niya, nakaapekto rin sa naging desisyon ng konseho ang ulat na hindi umano nagamit nang buo ang pondo ng Municipal Tourism Office noong 2025, sa kabila ng malaking panukalang dagdag sa budget nito.
Gayunman, sinabi ni Riano na may posibilidad pa umanong maibalik ang pondo sa kalagitnaan ng taon, partikular sa buwan ng Hunyo, sa pamamagitan ng pagpasa ng supplemental budget, bagama’t hindi pa ito tiyak at nakadepende pa kung magkakaroon ng sapat na mapagkukunan ng pondo ang lokal na pamahalaan.
Sa kabilang panig, nagpahayag ng pag-aalala si San Fernando Mayor Fernando U. Marin sa kawalan ng pondo para sa Municipal Tourism Office, at iginiit na ang zero budget para sa operasyon ng tanggapan ay lubhang nagpapahina sa kakayahan nito na magplano, makipag-ugnayan, at maghanda para sa mga oportunidad sa turismo ng bayan.
Ayon kay Marin, mahalagang mabigyan ng sapat na pondo ang sektor ng turismo upang mapanatili at mapaunlad ang mga destinasyong panturismo ng San Fernando na maaari ring magsilbing pinagkukunan ng kabuhayan ng mga residente.
Samantala, inaasahang ive-veto ng alkalde ang ilang probisyon ng ipinasang Appropriations Ordinance para sa 2026, kabilang na ang pagkakaltas ng pondo para sa Municipal Tourism Office, sa oras na mailabas ang opisyal na veto message ng lokal na ehekutibo.
