Ayon sa Philippine Statistics Authority (PSA) MIMAROPA, nananatiling pangunahing pagpipilian ng mga residente sa rehiyon ang mga pampublikong pasilidad medikal para sa pagpapagamot.
Batay sa 2022 National Demographic and Health Survey, 54.6% ng pagbisita sa mga pasilidad medikal ay sa pampubliko, bahagyang bumaba mula 60.2% noong 2017. Samantala, tumaas sa 45.4% ang bilang ng pumupunta sa pribadong pasilidad.
Pinakamalaki ang papel ng Barangay Health Stations (20.2%) sa serbisyong pangkalusugan sa komunidad, kasunod ang mga Rural Health Units, municipal at provincial hospitals, at iba pang pampublikong ospital.
Sa inpatient care, 70.5% ng mga pasyente ay na-confine sa mga pampublikong ospital, habang 29.5% naman sa pribado.
Binigyang-diin ng PSA ang pangangailangang patuloy na mag-invest sa pampublikong pasilidad, lalo na sa mga barangay health station, upang masiguro ang patas na access sa serbisyong pangkalusugan sa buong MIMAROPA.
