Halos 500 estudyante ng Romblon State University Romblon campus ang nakatanggap kamakailan ng educational assistance grant mula sa Department of Social Welfare and Development (DSWD).
Ang nasabing assistance ay mula sa Assistance to Individuals in Crisis Situation o AICS ng opisina ni Congressman Eleandro Madrona na dumalo rin sa pamamahagi nito sa Romblon, Romblon.
Sa ulat ng campus paper na The Clarion, sinabi ni Genalyn Trinidad ng DSWD na layunin ng educational assistance na mabawasan ang financial burdens ng mga estudyante at kanilang mga magulang.
Maliban kay Madrona, dumalo rin sa pamamahagi ng assistance ang mga opisyal ng Romblon State University sa pangunguna ni President Merian P. Catajay-Mani.
