Nanawagan ang National Nutrition Council (NNC)-MIMAROPA ng mas matatag na climate-responsive nutrition programs at pagsusulong ng sustainable food systems matapos lumabas sa pinakahuling survey na 35.1 porsyento ng mga kabahayan sa MIMAROPA ang nakaranas ng moderate hanggang severe food insecurity noong 2025.
Sa 52nd National Nutrition Month Regional Launching na ginanap sa Romblon State University noong July 7, inilatag ni NNC MIMAROPA Nutrition Officer III Keren Faye Gaya ang resulta ng 2025 DOST-FNRI Updating Survey, na nagpapakita na higit sa isa sa bawat tatlong kabahayan sa rehiyon ang nahirapang magkaroon ng sapat at masustansyang pagkain. Sa buong bansa, nasa 36.2 porsyento ang naitalang food insecurity.
Ipinakita rin ng survey na 2.9 porsyento ng mga kabahayan sa MIMAROPA at sa buong bansa ang nakaranas ng severe food insecurity.
Ayon kay Gaya, patuloy na pinalalala ng climate change ang mga hamon sa produksyon at distribusyon ng pagkain, dahilan upang higit na maapektuhan ang mga buntis at nagpapasusong ina, mga sanggol at maliliit na bata, senior citizens, mahihirap na pamilya, Indigenous Peoples, at mga komunidad sa geographically isolated and disadvantaged areas (GIDAs).
Binigyang-diin niya na mahalagang pangalagaan ang kalikasan upang matiyak ang sapat at masustansyang pagkain para sa mga pamilya.
“Kapag healthy ang ating ecosystem, resilient o strong ang ating food system,” ani Gaya.
Hinimok din niya ang mga komunidad na isulong ang sustainable food systems at responsableng pagkain habang pinangangalagaan ang likas na yaman upang matiyak ang pangmatagalang food security.
“Kailan ba tayo kikilos? Kapag wala nang pagkain? Kapag sirang-sira na ang kalikasan?” dagdag niya.
Hinimok din ng opisyal ang bawat tahanan na bawasan ang food waste sa pamamagitan ng tamang meal planning at responsableng pagkonsumo ng pagkain. Hinikayat din niya ang mga paaralan, komunidad, at iba pang institusyon na isulong ang mga napapanatiling gawi sa pagkain.
Nanawagan din si Gaya sa mga mambabatas, policymakers, at mga nagpapatupad ng programa na isama ang climate action sa mga polisiya at programa sa nutrisyon upang matugunan ang lumalalang epekto ng climate change at food insecurity.
Ang presentasyon ay bahagi ng pagdiriwang ng 52nd National Nutrition Month na may temang “Nutrisyon at Kalikasan, Ating Pangalagaan!”, na nagbibigay-diin sa ugnayan ng pangangalaga sa kalikasan, seguridad sa pagkain, at wastong nutrisyon.
