Ipinaliwanag ng Mines and Geosciences Bureau (MGB) ang geological characteristics ng Sibuyan Island at ang kasalukuyang status ng Mineral Production Sharing Agreement (MPSA) ng Altai Philippine Mining Corporation sa isinagawang konsultasyon kasama ang Department of Environment and Natural Resources (DENR) at mga residente ng isla.
Ayon sa MGB, malaking bahagi ng Sibuyan ay nasa ilalim ng tinatawag na Sibuyan Ophiolite Complex, isang geological formation na kumakatawan sa mga bato mula sa upper mantle hanggang oceanic crust at may mahalagang papel sa pag-unawa sa pagkakabuo ng kapuluan ng Pilipinas.
Ipinaliwanag din ng MGB na ang natatanging uri ng mga bato sa Sibuyan ang dahilan kung bakit mataas ang concentration ng nickel sa lateritic soil ng isla.
“Dahil po sa special na type ng bato na nandito sa Sibuyan, kaya rin po tumaas yung nickel concentration doon sa ating tinatawag na lateritic soil,” ayon sa kinatawan ng MGB.
Sinabi rin ng bureau na hindi lamang Sibuyan ang may ganitong uri ng nickel laterite deposits, dahil mayroon ding mga katulad na deposito sa Palawan, Surigao, Zambales at iba pang bahagi ng Pilipinas.
Status ng Altai MPSA
Sa talakayan, ipinaliwanag din ng MGB ang status ng MPSA ng Altai Philippine Mining Corporation, na kasalukuyang nasa exploration stage.
Ang MPSA ay kasunduan sa pagitan ng Philippine government at isang pribadong entity para sa development ng mineral resources sa isang lugar. Kabilang sa mineral commodities na nakasaad sa MPSA ng kumpanya ang nickel, iron, cobalt, chromite at iba pang associated mineral deposits.
Ayon sa MGB, inaprubahan ang MPSA noong 2009, na sinundan ng iba't ibang regulatory actions at imbestigasyon kaugnay ng exploration activities ng kumpanya.
Noong 2012, sinabi ng MGB na isa sa mga kailangang resolbahin ng kumpanya ay ang usapin ng social acceptability ng mining activities.
“Sa amin po sa MGB, mahalaga yung social acceptability. Dapat tanggap ng komunidad, tanggap ng local government yung pagmimina,” ayon sa kinatawan ng bureau.
Ipinaliwanag niya na mahalaga ang pagtanggap at pakikibahagi ng komunidad at lokal na pamahalaan dahil dapat silang maging katuwang ng kumpanya at national government sa mga aktibidad na may kaugnayan sa pagmimina.
Samantala, sinabi ng MGB na nagpapatuloy ang mga legal na usapin kaugnay ng mining activities habang patuloy nitong mino-monitor ang sitwasyon sa lugar sa pamamagitan ng MGB Regional Office.
Ipinaliwanag din ng bureau na ang pagmimina ay dumaraan sa iba't ibang yugto, mula prospecting at exploration, development and utilization, hanggang rehabilitation at decommissioning.
Sa kasalukuyan, ayon sa MGB, nasa exploration stage ang Altai MPSA.
Binigyang-diin din ng MGB na hindi awtomatikong nangangahulugan na kapag isinasailalim sa exploration ang isang lugar ay agad itong mamiminahan. Bahagi rin ng exploration ang pagtukoy sa mga yamang mineral at pag-alam kung alin sa mga likas na yaman ang dapat maprotektahan.
“Hindi lang po ‘yan para minahin kasi hindi ibig sabihin na ine-explore ang isang lugar ay miminahin muna. May mga ginagawang exploration para malaman po natin kung ano yung mga dapat nating i-preserve kasi ang development ay isang pagbabalanse ng mga different natural resources na meron po tayo sa lugar,” paliwanag ng MGB.
Discussion about this post