Hinarap ng mga kinatawan ng Department of Environment and Natural Resources (DENR) at Mines and Geosciences Bureau (MGB) ang mga residente ng Sibuyan Island sa isang pampublikong konsultasyon kaugnay ng patuloy na pagtutol ng ilang residente sa pagmimina sa isla.
Sa naturang pagpupulong, hiniling ng isang residente sa pamahalaan ang malinaw na assurance na hindi na matutuloy ang pagmimina sa kanilang lugar upang magkaroon umano ng kapayapaan ng isip ang mga Sibuyanon.
Bilang tugon, sinabi ni Dr. Kevin Garas, OIC ng Lands Geological Survey Division ng MGB, na mahirap sa kasalukuyan na magbigay ng eksaktong porsyento o tiyak na pangako hinggil sa magiging resulta ng proseso.
Gayunman, binigyang-diin ni Garas na malaking konsiderasyon sa gagawing pagsusuri ang social acceptability at mga saloobin ng mga residente.
Ayon sa opisyal, kasalukuyan pang pinoproseso ng MGB ang mga pahayag, pananaw at kahilingan na inilahad ng komunidad upang maisama sa opisyal na ulat na isusumite sa DENR Secretary.
Dumalo rin sa konsultasyon ang iba't ibang sektor ng komunidad, kabilang ang mga kinatawan ng Simbahang Katoliko at REPAM (Rhedes Ecumenical Pastoral Advisory and Management/Religious Organizations), na nagpahayag ng suporta sa panawagan ng mga residente.
Patuloy namang isinasagawa ng mga kinauukulang ahensya ang konsultasyon at pagsusuri bago maihain ang pinal na ulat hinggil sa usapin.
