Nagpaabot ng pasasalamat ang Altai Philippines Mining Corporation (APMC) sa Department of Environment and Natural Resources (DENR) matapos ang isinagawang site inspection at community consultation kaugnay ng mga aktibidad ng kumpanya sa Sibuyan Island, Romblon.
Sinabi ng APMC na mahalaga ang community consultation at site inspection upang mapakinggan ang iba’t ibang pananaw at mapag-usapan ang mga impormasyon tungkol sa geology ng Sibuyan at kasalukuyang status ng exploration sa lugar.
Nauna nang iniulat na isinagawa ng DENR ang site visitation at inspeksyon sa lugar na saklaw ng Mineral Production Sharing Agreement (MPSA) ng APMC, kasabay ng pampublikong konsultasyon kung saan tinalakay ang geological characteristics ng Sibuyan at ang status ng naturang MPSA.
Ayon sa APMC, ipinakita ng naturang mga aktibidad ang kahalagahan ng pakikinig, dayalogo at pakikipag-ugnayan sa mga stakeholder.
Itinuturing umano ng kumpanya ang konsultasyon bilang pagkakataon upang matuto mula sa mga komunidad at mapagtibay ang commitment nito sa bukas, transparent at maayos na pakikipag-ugnayan.
Sinabi rin ng APMC na kasalukuyan itong nasa ilalim ng bagong pamunuan na nagsusulong ng panibagong direksyon para sa kumpanya. Kabilang dito ang pagpapahusay sa mga proseso, pagkumpleto ng mga kinakailangang permit at regulatory requirements, pagpapatupad ng environmental at operational standards, at pagpapalakas ng pakikipag-ugnayan sa pamahalaan at mga komunidad.
Ayon sa kumpanya, bahagi ito ng patuloy nitong pagsisikap na maging mas bukas, transparent at responsable sa pakikipag-ugnayan sa mga stakeholder habang isinusulong ang mga commitment nito sa Sibuyan.
Ang APMC ay may MPSA na sumasaklaw sa 1,580.8010 ektarya sa San Fernando, Sibuyan Island. Batay sa presentasyong iniulat mula sa isinagawang DENR consultation, ang naturang MPSA ay kasalukuyang nasa exploration period.
