Labindalawang residente ng San Fernando, Sibuyan Island ang nakatanggap na ng subpoena mula sa Office of the Provincial Prosecutor of Romblon kaugnay ng mga reklamong inihain laban sa kanila matapos ang community protest noong July 6, 2026.
Ayon sa grupong Barikada ng Mamamayan ng Sibuyan, ang mga reklamo ay inihain ng isang empleyado ng Altai Philippines Mining Corporation (APMC), kaugnay ng naturang protesta na isinagawa habang pinagdedebatehan ng Sangguniang Bayan ng San Fernando ang kahilingan ng kumpanya para sa municipal endorsement ng proposed mining project nito.
Batay sa mga subpoena na natanggap na ng mga residente, kabilang sa mga alegasyon ang Grave Threats, Unjust Vexation at Light Coercion.
Inatasan ang mga respondent na magsumite ng kanilang counter-affidavit at mga kaugnay na ebidensya bilang bahagi ng preliminary investigation.
Sinabi naman ng grupo na inaasahan nilang maaari pang makatanggap ng subpoena ang iba pang community members kaugnay ng parehong mga reklamo.
Sinabi ng Barikada na nakahanda na ang legal assistance para sa mga respondent at sasagutin nila ang mga alegasyon sa pamamagitan ng itinakdang proseso.
“We will present the facts and evidence surrounding the July 6 protest and seek the dismissal of complaints that do not meet the legal requirements for prosecution,” ayon sa grupo.
Itinaas din ng Barikada ang usapin hinggil sa Strategic Lawsuits Against Public Participation (SLAPP) sa ilalim ng Rules of Procedure for Environmental Cases.
Ayon sa grupo, kailangang suriin kung naaangkop ang anti-SLAPP provisions sa mga reklamong inihain kaugnay ng protesta. Gayunman, kinilala rin nito na hindi awtomatikong SLAPP ang bawat reklamo laban sa isang environmental advocate at ang usapin ay dapat matukoy sa tamang legal na proseso.
Iginiit ng grupo na bahagi ng democratic participation at human rights ang karapatan ng mga komunidad na magsalita, magtipon nang mapayapa, magpetisyon sa pamahalaan at makilahok sa mga usaping may epekto sa kanilang kapaligiran at kinabukasan.
Binanggit din ng Barikada ang mga naunang pahayag ng Commission on Human Rights (CHR) tungkol sa pangangailangang maprotektahan ang environmental defenders at iba pang human rights defenders sa paggamit ng kanilang mga karapatan sa malayang pagpapahayag, pag-oorganisa at mapayapang pagtitipon.
