Nagpahayag ng pagkadismaya ang National Anti-Poverty Commission–Formal Labor and Migrant Workers Sectoral Council (NAPC-FLMWSC) sa pansamantalang pagsuspinde ng pagpapatupad ng Wage Order No. NCR-27, na nagkakaloob ng kabuuang ₱85 na dagdag sa arawang minimum na sahod ng mga manggagawa sa National Capital Region (NCR).
Sa ilalim ng wage order na inaprubahan ng Regional Tripartite Wages and Productivity Board–NCR (RTWPB-NCR), nakatakdang ipatupad ang unang tranche na ₱60 noong Hulyo 25, 2026, habang ang natitirang ₱25 ay nakatakdang ipatupad sa Enero 20, 2027.
Bagama't iginiit ng konseho na iginagalang nito ang kapangyarihan ng hudikatura at susunod sa Temporary Restraining Order (TRO) na inilabas ng Pasig Regional Trial Court, sinabi nitong may mga mahahalagang usaping legal na dapat isaalang-alang kaugnay ng naging suspensyon.
Ayon sa NAPC-FLMWSC, malinaw na nakasaad sa Republic Act No. 6727 o Wage Rationalization Act na ang sinumang tutol sa isang wage order ay dapat munang dumaan sa administrative appeal sa National Wages and Productivity Commission (NWPC) sa loob ng 10 araw mula sa paglalathala nito.
Binigyang-diin din ng konseho ang probisyon ng Article 126 ng Labor Code, na nagsasabing walang korte o tribunal ang maaaring maglabas ng injunction o temporary restraining order laban sa mga proceedings ng NWPC o ng Regional Wage Boards.
Ayon kay NAPC-FLMWSC Sectoral Representative Danilo A. Laserna, hindi dapat maapektuhan ang mga manggagawa ng isang legal na hamon na maaari namang idaan sa mekanismong itinakda ng batas.
“With due respect to the Pasig RTC, we also have to respect the law that created our tripartite wage-setting system. Workers waited for the wage increase after the completion of the prescribed process. They should not be made to bear the consequences of a legal challenge that could have been pursued through the administrative mechanism expressly provided under R.A. 6727,” ani Laserna.
Nagpahayag din ng pangamba ang konseho sa epekto ng suspensyon sa mga minimum wage earners at kanilang mga pamilya, lalo na sa gitna ng patuloy na pagtaas ng presyo ng pagkain, pamasahe, kuryente, pabahay, edukasyon, at iba pang pangunahing pangangailangan.
Iginiit ng NAPC-FLMWSC na dapat munang pairalin ang mekanismong itinakda ng batas sa pag-apela sa mga wage order bago ito dalhin sa korte, upang mapangalagaan ang karapatan at kapakanan ng mga manggagawa.
