Inaasahang mas maagang matatanggap ngayong taon ng mga kwalipikadong kawani ng pamahalaan ang kanilang Fiscal Year (FY) 2024 Performance-Based Bonus (PBB) matapos pabilisin ng pamahalaan ang proseso ng pagproseso at pagpapalabas nito.
Sa isang press briefing sa Malacañang noong Huwebes, sinabi ni Presidential Communications Office (PCO) Undersecretary at Palace Press Officer Claire Castro na ipoproseso na ng Department of Budget and Management (DBM) ang FY 2024 PBB at target itong maipamahagi sa loob ng taon, mas maaga kumpara sa mga nakaraang taon.
“Ang Fiscal Year 2024 Performance-Based Bonus para sa mga kwalipikadong kawani ng pamahalaan ay ipoproseso at inaasahang maipagkakaloob ngayong taon. Baka mas maaga pa,” ani Castro.
Ayon pa sa kanya, nakalaan na ang pondo para sa bonus sa ilalim ng Fiscal Year 2026 General Appropriations Act (GAA), kaya may sapat na pondo para sa pagpapalabas nito.
Dagdag ni Castro, ang mas maagang pagproseso at pagpapalabas ng PBB ay alinsunod sa Item 9 ng Executive Order No. 61 at sa Technical Working Group Memorandum Circular No. 2026-1 na may petsang July 3, 2026, na nagtatakda ng iskedyul, timeline, at mga pamamaraan sa implementasyon ng programa.
Hinikayat din niya ang mga kawani ng pamahalaan na sumangguni sa naturang memorandum circular para sa mas detalyadong impormasyon tungkol sa iskedyul ng pagproseso at pagpapalabas ng kanilang Performance-Based Bonus.
