Iginiit ni Pangulong Ferdinand R. Marcos Jr. na ang kanyang administrasyon ang unang nagsiwalat at nagsimulang umaksyon sa mga umano’y anomalya sa mga flood control projects ng pamahalaan.
Sa panayam sa Canada nitong Sabado (oras sa Canada), sinabi ng Pangulo na kung hindi niya binanggit ang usapin sa kanyang ikaapat na State of the Nation Address (SONA), hindi umano ito magiging sentro ng kasalukuyang mga imbestigasyon.
“Kung hindi ko sinabi yung sinabi ko sa SONA, wala tayong pinag-uusapan na ganito. I’m the one who exposed all of this,” ani Marcos.
Sinabi ng Pangulo na nagpapatuloy ang kampanya ng kanyang administrasyon laban sa korapsyon at aminado siyang hindi pa tapos ang mga imbestigasyon.
“Well, I cannot say that we have done enough because we are not done yet. Unfortunately, the more we look, the more we find,” aniya.
Ayon kay Marcos, lumalabas sa mga imbestigasyon na ang mga umano’y iregularidad ay nagsimula pa bago ang kanyang panunungkulan.
Binanggit niya na noong 2018 ay inihayag na rin noon ni dating House Minority Floor Leader Danilo “Nonoy” Andaya Jr. ang umano’y mahigit ₱300 bilyong anomalya sa flood control projects.
Dagdag pa ng Pangulo, kinilala noon ni dating Pangulong Rodrigo Duterte na may mga problema sa mga flood control projects, ngunit sinabi niyang wala umanong naging pananagutan sa mga sangkot.
“Having acknowledged it, it did not find accountability in anybody. So I guess that was left up to me. And so we are still doing it. We’re still working on it,” ani Marcos.
Binigyang-diin din niya na ang korapsyon ay isang malalim na suliranin na nangangailangan hindi lamang ng mga imbestigasyon kundi maging ng mga reporma sa sistema ng pamahalaan at pagbabago sa kultura sa loob ng burukrasya.
“This is a deep-seated system of corruption that requires not only structural changes in the way government is run, in the way the budget is written, but also a change in attitude,” aniya.
Tinugunan din ng Pangulo ang mga kritisismo ng kanyang mga kalaban sa pulitika kaugnay ng isyu ng korapsyon.
“And I’m the only one that has started to do anything about this,” sabi niya.
Idinagdag ni Marcos na mayroon nang mga isinampang kaso, pag-freeze ng bank accounts, at iba pang hakbang laban sa mga indibidwal na iniuugnay sa umano’y anomalya sa flood control projects.
Matatandaang matapos ang pahayag ng Pangulo na “Mahiya naman kayo,” nagsampa ng mga kaso ang Department of Justice at Office of the Ombudsman laban sa ilang indibidwal na iniuugnay sa umano’y iregularidad sa mga flood control project.
Ayon sa Pangulo, mananatiling nakatuon ang kanyang administrasyon sa pagpapanagot sa mga sangkot at sa pagpapatupad ng mga repormang magpapalakas sa transparency at integridad sa pamahalaan. (PR)
