Inaresto ng mga awtoridad ang No. 3 Most Wanted Person sa antas ng lalawigan sa isinagawang operasyon sa Barangay Lico, Cajidiocan nitong July 24.
Isinagawa ang pag-aresto ng mga operatiba ng Cajidiocan Municipal Police Station (MPS), katuwang ang Provincial Intelligence Unit at Maritime Police Station (MARPSTA), sa bisa ng warrant of arrest na inilabas ng Regional Trial Court Branch 106 sa Cajidiocan.
Nahaharap ang 46-anyos na suspek sa walong bilang ng Qualified Rape. Hindi na ito nanlaban nang arestuhin at agad na dinala sa himpilan ng Cajidiocan MPS para sa kaukulang proseso.
Dahil menor de edad ang biktima sa kaso, hindi na isinapubliko ng pulisya ang pagkakakilanlan ng suspek alinsunod sa mga umiiral na batas na nagpoprotekta sa mga biktima ng sexual abuse.
Ayon sa Cajidiocan MPS sa pamumuno ni Police Captain Mary Jade M. Gaca, patuloy silang nagpapatupad ng iba't ibang police interventions upang mapigilan at mabawasan ang mga kaso ng panggagahasa, lalo na ang mga kinasasangkutan ng mga menor de edad, sa bayan.
