Isang 35-anyos na lalaki ang nasawi matapos bumangga ang minamaneho nitong motorsiklo sa isang nakaparadang backhoe sa Barangay Cantagda, Cajidiocan, Romblon noong Biyernes ng gabi.
Ayon sa Cajidiocan Municipal Police Station (MPS), agad na rumesponde ang mga tauhan ng Municipal Disaster Risk Reduction and Management Office (MDRRMO) at isinugod ang biktima sa Sibuyan District Hospital. Gayunman, binawian din ito ng buhay habang ginagamot dahil sa tinamong matinding pinsala sa ulo.
Sa isinagawang imbestigasyon ng pulisya, napag-alamang may nakalagay na mga early warning devices sa nakaparadang backhoe na pagmamay-ari ng Mt. Guiting-Guiting Construction, ngunit sa hindi pa matukoy na dahilan ay hindi ito napansin ng biktima kaya bumangga siya sa naturang heavy equipment.
Kasunod ng insidente, muling pinaalalahanan ng Cajidiocan MPS ang mga motorista na laging magsuot ng protective helmet at maging mapagmatyag sa pagmamaneho, lalo na sa mga lugar na may isinasagawang road construction.
Ayon sa pulisya, mahalagang sundin ang mga traffic signs at warning devices upang maiwasan ang mga aksidente sa kalsada at mapangalagaan ang kaligtasan ng lahat ng gumagamit nito.
