Sinimulan ng Department of Social Welfare and Development (DSWD) Romblon ngayong Hulyo 20 ang pamamahagi ng cash assistance sa mga kwalipikadong benepisyaryo sa lalawigan sa ilalim ng Unified Package for Livelihoods, Industry, Food, and Transport (UPLIFT) Program.
Unang isinagawa ang payout sa bayan ng Odiongan, kung saan 1,298 validated recipients ang tumanggap ng paunang ₱2,000 na ayuda.
Ang UPLIFT ay programa ng administrasyon ni Pangulong Ferdinand R. Marcos Jr. na naglalayong magbigay ng pansamantalang tulong sa mahihirap, near-poor, at low-income households upang mabawasan ang epekto ng pagtaas ng presyo ng mga pangunahing bilihin at masuportahan ang kanilang pang-araw-araw na pangangailangan.
Sa ilalim ng programa, makatatanggap ang bawat benepisyaryo ng ₱2,000 kada buwan sa loob ng anim na buwan, o kabuuang ₱12,000. Tinatayang 10,593 benepisyaryo sa buong lalawigan ng Romblon ang inaasahang mabibigyan ng naturang ayuda.
Ayon kay Mayflor Guintindola ng Barangay Progreso Este, malaking tulong ang natanggap niyang ayuda para sa kanyang pamilya.
“Nag-aalaga lang po ako ng mga apo. Malaking halaga na po ito para sa bigas, ulam, baon ng mga bata at pamasahe. Maraming salamat po kay Pangulong Bongbong Marcos sa financial na tulong na ito. Malaking tulong po ito sa amin,” ani Guintindola.
Nagpasalamat din si Hendrick Gan, isang 29-anyos na construction worker mula sa Barangay Panique, dahil makatutulong umano ang ayuda sa kanilang pang-araw-araw na gastusin.
“Medyo kapos po talaga ang kita namin kaya malaking dagdag ito sa budget. Magagamit po namin ito sa mga pangangailangan sa bahay, tulad ng pagpapagawa ng CR. Maraming salamat po sa DSWD at kay Pangulong PBBM dahil napili kami kahit hindi namin ito inaasahan,” aniya.
Samantala, sinabi naman ni Jose Fernando, isang magsasaka, na malaking ginhawa ang natanggap na tulong para sa kanyang pamilya.
“Napakaraming salamat sa tulong. Makakatulong ito sa aming mga pangangailangan, lalo na sa pagbili ng pagkain, mga gamit sa bahay at baon ng mga apo ko,” saad ni Fernando.
Ayon sa DSWD, magpapatuloy ang payout sa iba pang mga bayan sa Romblon hanggang maipamahagi ang ayuda sa lahat ng kwalipikadong benepisyaryo sa ilalim ng UPLIFT Program.
Discussion about this post