Nagsagawa ang Pamahalaang Bayan ng Romblon ng Serbisyo Caravan 2026 upang dalhin ang iba't ibang pangunahing serbisyo ng pamahalaan sa mga barangay, partikular sa mga komunidad na malalayo at kinakailangan pang bumiyahe o tumawid ng dagat upang makapag-avail ng mga serbisyo.
Sinimulan ang caravan noong June 26 at inaasahang magtatapos sa July 30, kung saan umiikot ito sa iba't ibang barangay ng bayan upang mailapit sa mga residente ang mga frontline government services.
Kabilang sa mga serbisyong ipinagkaloob ang medical consultation, laboratory services, at libreng dental check-up na isinagawa sa tulong ng mga volunteer dentist mula sa Philippine Dental Association–Romblon Chapter.
Nakiisa rin sa programa ang mga banking institutions tulad ng BDO Network Bank at Netbank, gayundin ang mga ahensya ng pamahalaan gaya ng Philippine Statistics Authority (PSA), PhilHealth, Pag-IBIG Fund, at iba pa upang magbigay ng mga serbisyong may kaugnayan sa civil registration, permit processing, tax-related transactions, at iba pang government services.
Ayon sa lokal na pamahalaan, layunin ng Serbisyo Caravan na gawing mas accessible ang mga serbisyo ng gobyerno, lalo na sa mga residenteng nasa malalayong barangay na nahihirapang magtungo sa mga tanggapan ng iba't ibang ahensya upang magproseso ng kanilang mga pangangailangan.
